BQO-da 10 mln teńgeniń múlkin jymqyrǵan qaraǵandylyq turǵyndar ustaldy
BQO polıtsııa departamentiniń baspasóz qyzmeti málim etkenindeı, kúdiktiler 29 qańtar kúni saǵat 04.00-de qolǵa tústi.
Oral-Atyraý joly boıynda Aqjaıyq aýdany Chapaev aýyly tusynda jalǵan memlekettik nómir taqqan, Qaraǵandy oblysynyń 1982 jáne 1985 jylǵy turǵyndary otyrǵan «Folksvagen Passat» avtokóligi toqtatyldy. Avtokólik salonyn qaraǵan kezde «Batys Qazaqstan elektr jelilerin taratý kompanııasy» JShS Kaztalov aýdandyq elektr torabynan urlanǵan múlik tabyldy.
Munyń aldynda, 25 qańtar kúni belgisiz bireýler atalmysh mekemeniń aýmaǵyna zańsyz kirip, transformatordan qosalqy bólshekter urlap ketken bolatyn. Keltirilgen zalal kólemi – 1 mln 879 myń teńge.
Jedel tergeý is-sharalary barysynda kúdiktilerdiń Jánibek jáne Jańaqala aýdandarynda osyndaı úsh qylmysqa qatysy bar ekendigi anyqtaldy.
Qazirgi kezde kúdiktilerdiń biri Kaztalov aýdany polıtsııa bóliminiń ýaqytsha ustaý ızolıatoryna qamaldy.
QR QK 188-baby 3-bóligine (iri mólsherdegi urlyq) sáıkes sotqa deıingi tergeý amaldary júrgizilýde.
Barlyq urlyq boıynsha keltirilgen zalal kólemi – 10 mln 829 myń teńge.
Eske sala keteıik, budan buryn Batys Qazaqstan oblysynda jol apatynan eki adamnyń qaza tapqanyn jazǵan bolatynbyz.