BQO-da 10 ınvestıtsııalyq jobany júzege asyrý kózdelýde

ORAL. QazAqparat – Batys Qazaqstan oblysynda bıyl 19 mlrd astam teńgeni quraıtyn 10 ınvestıtsııalyq jobany júzege asyrý kózdelýde, dep habarlaıdy QazAqparat tilshisi.

Oblys ákimi Ǵalı Esqalıevtiń aıtýynsha, óńirde barlyǵy 1,9 trln teńgeni quraıtyn 25 ınvestıtsııalyq joba qolǵa alynǵan bolatyn.

Óńir basshysynyń sózine qaraǵanda, bıylǵy álemdik pandemııa jáne munaı baǵasynyń ózgerýi birqatar josparlarǵa áser etken. Sondyqtan birqatar jobalar kelesi jylǵa qaldyryldy. Investorlar budan bas tartyp otyrǵan joq. Batys Qazaqstannyń ınvestıtsııalyq tartymdy óńir, Reseıdiń bes birdeı oblysymen shektesetindigin eskerip, ekonomıkalyq jaǵdaı túzelgen kezde iske kirispekshi.

«Investıtsııalardyń 80 paıyzy «Qarashyǵanaq Petrolıým Opereıtıng b.v.» men «Jaıyqmunaı» kompanııalaryna tıesili. Biz munaıgaz salasyna táýeldilikten qutylyp, halyqtyń ál-aýhatyn arttyratyn basqa salalardy damytqymyz keledi. Mysaly, jylyjaılar, kókónis saqtaıtyn qoımalar salynýda», dedi oblys basshysy.

Onyń sózine qaraǵanda, ınvestorlar keńesinde 46 mlrd teńgeni quraıtyn, 900-den astam turaqty jumys ornyn ashýǵa múmkindik beretin taǵy 18 joba maquldandy. Tórt joba boıynsha qurylys bastalyp ketti.

Aıtalyq, Oral qalasynda úsh birdeı kóterme saýda-taratý ortalyǵy salynýda. Bul jobalarǵa 10 mlrd astam teńge salynyp, qosymsha 22 myńnan astam tonna ónim saqtalmaqshy.

Sol sekildi 281 gektar jerde ındýstrııalyq aımaqtyń syrtqy ınfraqurylymy salyna bastady. Іshki ınfraqurylymdy damytyp, ınvestorlardy tartatyn sheteldik «EuralHub» kompanııasymen memorandým jasaldy.

Aıta keteıik, bıylǵy on aıda negizgi qarjyǵa 364,6 mlrd teńge ınvestıtsııa qosyldy.