BQO-da 1 trln. 620 mlrd. teńgeniń ónerkásip ónimderi óndirildi
ORAL. QazAqparat - Ótken jyly BQO-nyń áleýmettik-ekonomıkalyq damýynda oń kórsetkishterge qol jetkizildi. 2016 jyldyń toǵyz aıynyń qorytyndysy boıynsha ishki jalpy ónim 2,6 paıyzǵa ósti. 2016 jyly 1 trln. 620 mlrd. teńgeniń ónerkásip ónimderi óndirildi, bul 2015 jylǵydan (1 trln. 302 mlrd. teńge) artyq.
Bul týraly búgin tennıs ortalyǵyndaǵy turǵyndarmen eseptik kezdesýinde oblys ákimi Altaı Kólginov málim etti, dep habarlaıdy «QazAqparat» HAA tilshisi.
Onyń aıtýynsha, josparly jóndeýge baılanysty Qarashyǵanaq kenishinde ónerkásip óniminiń kólemi 1,2 paıyzǵa qysqarǵanymen, óńdeý ónerkásibinde ónim kólemi 2,5, eńbek ónimdiligi 37,5 paıyzǵa artty.
Eńbek ónimdiliginiń kóbeıýine joǵary tehnologııaǵa negizdelgen kásiporyndardaǵy ónim kóleminiń ulǵaıýy yqpal etti. Mysaly, «Kondensat» AQ 11 mlrd. astam teńgege 160 myńnan astam tonna, sonyń ishinde K-5 eýro talaptaryna saı keletin 20 myń tonna benzın shyǵardy. «Kvant» jıhaz fabrıkasy 2,5 mlrd. teńgege ónim óndirip, 585 mln. astam teńge salyq tóledi. «Oral transformator zaýyty» JShS-da 300 jańa jumys orny ashylyp, 2,5 mlrd. teńgeniń ónimi óndirilip, 300 mln. teńge salyq aýdaryldy. Ónimniń 80 paıyzy eksportqa baǵyttaldy. Osyndaı mysaldardy basqa kásiporyndar boıynsha da keltirýge bolady.
Indýstrııalandyrý kartasy aıasynda 2016 jyly 10 jańa joba iske qosylyp, 520-dan astam turaqty jumys orny ashyldy. Barlyǵy 335 mlrd. teńgege 47 joba júzege asyrylýda. Bul jobalardyń barlyǵy Elbasynyń turaqty nazarynda.
Óńir basshysy ár salada atqarylǵan jumystarmen qatar Elbasy tapsyrmasyna sáıkes alda turǵan mindetterge toqtaldy.
