BQO-da 1-synypqa 12 myńǵa jýyq oqýshy qabyldanbaq
ORAL. QazAqparat - Batys Qazaqstan oblysynda 2017-2018 oqý jylynda 1-synypqa 11 800-den astam oqýshy qabyldanbaq. Bul týraly Batys Qazaqstan óńirlik kommýnıkatsııalar qyzmetiniń alańynda búgin oblystyq bilim basqarmasy basshysynyń mindetin atqarýshy Záýre Ǵumarova málim etti, dep habarlaıdy «QazAqparat» tilshisi.
Onyń aıtýynsha, óńirde 381 memlekettik jalpy bilim beretin mektepte 94 myńnan astam oqýshy bilim almaq.
Oqýshylar kontıngentiniń azaıyp, talapqa saı kelmeýine baılanysty úsh bastaýysh mektep (Qaztalov aýdanynda Haırýsh, Saraljyn, Terektide Qandyq mektepteri) jabyldy. Oqýshy sanyna baılanysty 1 negizgi mektep orta (Aqjaıyq aýdany M.Ótemisov atyndaǵy mektep), 1 orta mektep negizgi (Terekti aýdany Talpyn mektebi) bolyp qaıta quryldy.
Oqýlyqtardy satyp alý úshin jergilikti bıýdjetten 2 334,9 mln. teńge bólindi. Oblysta jańartylǵan bilim mazmunyna kóshýge baılanysty 2, 5, 7-synyptardyń barlyq oqýlyqtary, mektepaldy daıarlyq, arnaýly mektep oqýlyqtaryna, aǵylshyn tilinde jaratylystaný baǵytyndaǵy oqýlyqtarǵa jáne qordy tolyqtyrý maqsatynda 1244 myńnan astam oqýlyq pen oqý-ádistemelik keshenge tapsyrys berildi. Baspalarmen kelisimshart jasalyp, 30 tamyzǵa deıin oqýlyqtardy tasymaldaý jumysy júrgizilýde. Qazirgi tańda oqýlyqtardyń 20 paıyzy aýdandar men qalaǵa jetkizildi.
Jergilikti bıýdjet esebinen 12 bilim nysanyn kúrdeli jóndeýge 1 241,0 mln. teńge qaralsa, kúni búgin sonyń beseýinde jumys márege jetti. Sondaı-aq oblysta 9 bilim nysany salynyp jatsa, sonyń ishinde Ulttyq qor qarjysyna Oral qalasynyń Derkól kentinde árqaısysy 600 oryndyq eki mektep, Zachagandaǵy «Sarytaý» shaǵynaýdanynda 900 oryndyq mektep jáne shahardyń ózinde apatty jaǵdaıdaǵy №4 orta mekteptiń jańa ǵımaraty boı kóterýde. Bulardyń ishinde Derkóldegi ekinshi mektepten basqasy bıyl iske qosylmaq. Oǵan qosa respýblıkalyq bıýdjet esebinen Zelenov aýdany Darııan aýylynda 100 oryndyq ınternatymen 300 oryndyq mektep 2018 jyly salynyp bitpek. Jergilikti bıýdjet esebinen Qaztalov aýylynda 100 oryndyq mektep janyndaǵy ınternat pen Bórli aýdanynyń Keńtúbeginde 50 oryndyq balabaqsha 2017 jyly paıdalanýǵa berilmek. Shetel ınvestıtsııasy esebinen Bórli aýdanynyń Araltal aýylynda 300 oryndyq (aıaqtalý merzimi - 2017 jylǵy qarasha) jáne Aqjaıyqtyń Shabdarjap aýylynda 198 oryndyq (2018 jyly bitpek) mektep salynýda.
Jazǵy kezeńde barlyǵy 20 demalys lagerimen 6 824 oqýshy qamtyldy. 350 mektep janyndaǵy tamaqtanýy uıymdastyrylǵan lagerde 33 238, ondaı tamaǵy joq 228 alańda 23 363, 25 shatyrly lagerde 3 869 bala tynyqty.
«Ótken oqý jylynda bilim berý mekemelerinde 21 850 pedagog jumys jasady. Jalpy bilim beretin mektepterde 11971 muǵalim qyzmet etti. Qazirgi tańda 105 maman, ásirese, ulttyq mekteptegi orys tili men ádebıeti, matematıka pánderiniń muǵalimderi jetispeıdi. Bul máseleni jas mamandardy qabyldaý, zeınetkerlerdi tartý jáne júktemelerdi kóbeıtý esebinen sheshý kózdelýde», dedi Záýre Bazarǵalıqyzy.
