BQO-da 1 mlrd teńgelik esirtki shemasy áshkerelendi: 11 kúdikti anyqtaldy
ASTANA. KAZINFORM – Batys Qazaqstan oblysynda polıtsııa qyzmetkerleri UQKD jáne oblys prokýratýrasymen birlesip, kúshti áser etetin dárilik preparattardy zańsyz taratýmen aınalysqan uıymdasqan qylmystyq toptyń jolyn kesti, dep habarlaıdy Polisia.kz.
Vedomstvo málimetinshe, qylmystyq top óz áreketin zańdy farmatsevtıkalyq qyzmet retinde kórsetip, jasyryn túrde psıhoaktıvti jáne táýeldilik týdyratyn dárilerdi taratqan. Bul qubylys óńirde jastar arasynda «dárihanalyq nashaqorlyqtyń» keń taralýyna sebep bolǵan.
Negizgi tutynýshylar 18-25 jas aralyǵyndaǵy jastar bolǵan. Olardyń qatarynda buryn sottalǵandar da, esepte turǵandar da, sondaı-aq alǵash ret esirtki qoldanǵandar da bar.
– Atalǵan top óz áreketin zańdy farmatsevtıkalyq qyzmet retinde búrkemelep, jasyryn túrde psıhoaktıvti, táýeldilik týdyratyn jáne eseńgiretetin dárilerdi keńinen taratqan. Júrgizilgen jedel-tergeý sharalary nátıjesinde qylmystyq shema tolyq toqtatylyp, zańsyz aınalymnan iri kólemdegi dárilik preparattar, esirtki zattary, oq-dáriler jáne qomaqty aqsha tárkilendi, – dep habarlady polıtsııa.
Sonymen qatar tyıym salynǵan ósimdikterdi zańsyz ósirý derekteri anyqtalǵan.
Jalpy 11 kúdikti belgili boldy. Onyń ishinde uıymdasqan toptyń 6 negizgi múshesi qamaýǵa alynǵan. Aldyn ala málimet boıynsha, qylmystyq toptyń aınalymy shamamen 1 mlrd teńgeni quraǵan.
Qylmystyq jolmen alynǵan múlikke, onyń ishinde jyljymaıtyn nysandar men qymbat avtokólikterge tyıym salyndy.
– Bul operatsııa óńirdegi kóleńkeli esirtki naryǵyna eleýli soqqy berip, jastardyń nashaqorlyqqa tartylýynyń aldyn alýǵa múmkindik berdi. Psıhoaktıvti zattardyń zańsyz aınalymyna qatysty kez kelgen áreket zań aıasynda toqtatylyp, kináliler qatań jaýapkershilikke tartylady, – delingen vedomstvo málimetinde.
Qazirgi ýaqytta tergeý jalǵasyp jatyr. QR QPK-niń 201-babyna sáıkes ózge aqparat jarııa etilmeıdi.
Aıta keteıik, Astanada esirtki taratýǵa qatysy bar saıttar buǵattaldy.
