BQO-da 1 mln gektarǵa jýyq jer memleketke qaıtaryldy
ORAL. QazAqparat - Batys Qazaqstan oblysynda 1 mln gektarǵa jýyq jer memleketke qaıtaryldy. Bul týraly Óńirlik kommýnıkatsııalar qyzmetinde oblystyq jer qatynastary basqarmasynyń basshysy Álııa Muhanbetjanova málim etti, dep habarlaıdy QazAqparat tilshisi.
Álııa Bıǵazyqyzynyń aıtýynsha, Elbasy tapsyrmasyna sáıkes óńirde jergilikti atqarýshy jáne ókiletti organdar paıdalanylmaı jatqan jerlerdi anyqtaý jáne olardy aýyl sharýashylyǵy aınalymyna qaıta qosý baǵytynda tıisti jumystardy atqaryp keledi.
Sonyń nátıjesinde 2012-2018 jyldary 1 mln 425 myń gektar alqaptyń ıgerilmeı jatqany belgili boldy. Qazirgi kezde sonyń 70 paıyzy nemese 997 myń gektar jer memleketke qaıtaryldy. Keri alynǵan jerlerdiń 55 paıyzy nemese 545 myń gektary aýyl sharýashylyǵy aınalymyna qaıta qosyldy.
Degenmen qazirgi tańda qalǵan 452 myń gektar jer nemese 45 paıyzy aýyl sharýashylyǵy aınalymyna enbeı otyr. Munyń basym bóligi Aqjaıyq, Bórli, Jánibek, Qaztalov, Syrym jáne Shyńǵyrlaý aýdandarynyń úlesine tıedi.
Jergilikti atqarýshy organdar júrgizgen jumys nátıjesinde jer paıdalanýshylar 336 myń gektar (24 paıyz) alqapty ıgerýge kiristi.
Sonymen qatar 92 myń gektardy (6 paıyz) quraıtyn ýchaskeler boıynsha ákimshilik yqpal etý sharalary qabyldanýda. Sonyń qorytyndysyna sáıkes kemshilikti joıý jóninde uıǵarymdar beriledi, munyń merzimi bitkennen keıin qaıta tekseriledi.
Bıyl jer paıdalanýshylarǵa aýyl sharýashylyǵy maqsatyndaǵy jerdiń quqyǵyn berý maqsatynda jalpy alańy 51 myń gektardy quraıtyn 67 jer telimi boıynsha 10 konkýrs ótkizildi.
Oǵan qosa kúni búgin aýdandarda memleketke qaıtarylǵan jer esebinen 57 myń gektardy quraıtyn 87 jer ýchaskesi boıynsha 9 konkýrs ótkizý kózdelýde.
«Bıyldan bastap 12 aýdan men Oral qalasyn elektrondy kartalarmen qamtamasyz etý baǵytynda jumystar júrgizildi. Qazirgi tańda «zem.kz» portaly jumys jasaıdy, onda eldi mekenderdegi bos jer telimderine, sondaı-aq konkýrs arqyly berilýi josparlanyp otyrǵan aýyl sharýashylyǵy maqsatyndaǵy jerlerge, jeke turǵyn úı salý úshin jer telimin alýǵa kezekke turǵandarǵa, josyqsyz jer paıdalanýshylar tizilimine qatysty aqparattar bar», - dedi Á.Muhanbetjanova.
