BQO-da 1 myńnan astam is boıynsha alıment bereshegi ótelmeı otyr

ORAL. KAZINFORM — Batys Qazaqstan oblysynda ótken jyly alıment óndirý boıynsha jeke sot oryndaýshylary óndirisinde 13 608 (2024 jyly — 14 276) atqarý qujaty boldy. 

BQO ádilet departamentiniń basshysy Álııa Tasybaevanyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde jalpy somasy 680 mln 108,532 myń teńge bolatyn 1 521 (2024 jyly — 1 597) atqarý qujaty kúrdeli kúıinde qalyp otyr.

Onyń sózine qaraǵanda, alıment boıynsha bereshegi bar boryshkerlerge qatysty 854 (375) qaýly shyǵarylǵan.

— Bereshek múldem ótelmeıtin ister sany — 1 087 (aldyńǵy jyly 1 597 bolǵan). Al 154 is (169) boıynsha bereshek ishinara óteledi. Alıment boıynsha bereshektiń ósýiniń basty sebepteriniń biri — boryshkerlerdiń áleýmettik jaǵdaıynyń tómendigi. Olardyń kóbiniń turaqty tabysy nemese resmı jumys orny joq, — dedi Álııa Tasybaeva.

Departament derekterine qaraǵanda, ótken jyly 19 bos oryndar jármeńkesi ótkizilip, qorytyndysy boıynsha 485 boryshker jumysqa ornalastyrylǵan.

Alıment boıynsha 256 boryshker ákimshilik jaýapkershilikke tartyldy. Jeteýi QK 139-babyna sáıkes sottaldy. Bereshekti óteý úshin 510 mln teńge óndirildi.

Eske sala keteıik, budan buryn alıment tólemegen BQO turǵyny sottalǵanyn jazǵan bolatynbyz.