BQO-da 1 400-ge jýyq jasty áskerı qyzmetke jiberý kózdelip otyr
ORAL. KAZINFORM – Batys Qazaqstan oblysynda 2026 jyly 1 391 jasty merzimdi áskerı qyzmetke jiberý josparlandy.
BQO qorǵanys isteri jónindegi departamenti bastyǵynyń orynbasary – áskerge shaqyrý jáne áskerden tys jumys basqarmasynyń bastyǵy, podpolkovnık Maqsat Sapınovtyń óńirlik kommýnıkatsııalar qyzmeti alańynda ótken brıfıngide málim etkenindeı, 2024 jyly oblystan 1 302 azamat áskerı boryshyn óteýge attanǵan edi. Ótken jyly olardyń sany 1 295 boldy.
Maqsat Zamanbekulynyń sózine qaraǵanda, bıyl UQK Shekara qyzmetine 60, Memlekettik kúzet qyzmetine 8, QR Qarýly kúshterine 370, TJ mınıstrligine 20, ІІM Ulttyq ulanyna 220 adam jiberý kózdelip otyr.
2025 jyly kúzde áskerı qurylymdardy jastarmen jasaqtaýǵa berilgen júkteme 658 adam bolsa, 672 azamat shaqyrylyp, 102 paıyzǵa oryndaldy.
- Azamattardy áskerı qyzmetke shaqyrý - bul memlekettik organdar ótkizetin, áskerı mindettilik negizinde áskerler quramyn jastarmen jasaqtaýǵa baǵyttalǵan is-sharalar kesheni. Muny jergilikti atqarýshy organdar uıymdastyrady jáne qamtamasyz etedi. Mekeme basshylary shaqyrylýǵa jatatyn azamattardy issaparlardan keri qaıtaryp alýǵa, olardyń naýqan kezinde medıtsınalyq kýálandyrýdan ótýi úshin shaqyrý pýnktine ýaqytyly kelýin uıymdastyrýǵa mindetti, - dedi M.Sapınov.
Onyń aıtýynsha, merzimdi áskerı qyzmetke shaqyrý QR Zańdaryna, Úkimettiń qaýlylaryna jáne Qorǵanys mınıstriniń buıryqtaryna sáıkes júzege asyrylady. Qorǵanys isteri jónindegi basqarmalar men bólimder medıtsınalyq komıssııalardy dáriger-mamandarmen jáne orta medıtsınalyq qyzmetkerlermen 100 paıyz qamtamasyz etedi. Sondaı-aq jastardy medıtsınalyq kýálandyrýdan sapaly ótkizý, olardy ýaqytyly jóneltý, densaýlyq jaǵdaıy boıynsha áskerden oralý jaǵdaılaryn boldyrmaý da mańyzdy.
Eske sala keteıik, budan buryn Oralda áskerge barýdan qashqan tórt jigittiń biri aýyr halde jatqanyn jazǵan bolatynbyz.
