BQO boıynsha eńbek ınspektsııasy basqarmasynyń alty qyzmetkeri jazalandy
BQO prokýratýrasynyń baspasóz qyzmetinen túsken málimetke qaraǵanda, bıylǵy on bir aıda óńirde óndiriste 79 jazataıym oqıǵa tirkelse, sonyń 61-i óndirispen baılanysty bolyp otyr. Sonyń basym kópshiligi qurylys, mashına jasaý salalary men shaǵyn bıznestiń úlesine tıedi.
Tekseris ınspektsııa qyzmetkerleriniń jazataıym oqıǵaǵa baılanysty komıssııany ýaqtyly qurmaıtyndyǵyn, ony júrgizý merzimin negizsiz sozatyndyǵyn, arnaıy tekserý materıaldarynyń tolyq túzilmeıtinin kórsetti. Mysaly, «Oral Agrosnab» JShS jumysshysyna qatysty jazataıym oqıǵany tergeý boıynsha komıssııa qurý týraly buıryq zańmen belgilengen merzim buzylyp, toǵyz kúnge keshiktirilip shyǵarylǵan. Osyndaı olqylyqtar basqa oqıǵalar boıynsha komıssııa qurý kezinde de oryn alǵan. Oǵan qosa jumys berýshiniń BQO eńbek ınspektorynyń aktisine bergen jeke qarsylyǵy tirkelmeı, bas memlekettik eńbek ınspektorynyń qaperine salynbaǵany, osylaısha jumys berýshiniń quqyǵy buzylǵandyǵy belgili boldy.
Tekseris nátıjesinde oblys prokýratýrasynyń usynysy boıynsha ınspektsııanyń alty laýazymdy qyzmetkeri tártiptik jaýapkershilikke tartyldy.