BQO boıynsha Dezınfektsııa ortalyǵynyń basshylyǵyna qatysty qylmystyq is qozǵaldy
ORAL. QazAqparat - Batys Qazaqstan oblysy boıynsha Dezınfektsııa ortalyǵy basshylyǵyna qarjy jymqyrdy degen aıyp taǵyldy, dep habarlaıdy QazAqparat tilshisi.
Sybaılas jemqorlyqqa qarsy is-qımyl ulttyq bıýrosy BQO boıynsha departamentiniń baspasóz qyzmetinen túsken málimetke qaraǵanda, qazirgi kezde QR DSM Qoǵamdyq densaýlyq saqtaý komıteti «Ulttyq saraptama ortalyǵy» Sharýashylyq júrgizý quqyǵyndaǵy RMK-ǵa qarasty «Batys Qazaqstan oblysy boıynsha dezınfektsııa ortalyǵynyń» laýazymdy qyzmetkerlerine qatysty QR QK 189-baby 3-bóligi 2-tarmaǵyna sáıkes qylmystyq is qozǵalyp, tergeý amaldary júrgizilýde.
Olar aldyn ala sóz baılasyp, 2018 jyldyń qarasha jáne jeltoqsan aılarynda jalpy somasy 2 mln 120 myń teńgeniń taýarly-materıaldyq qundylyqtaryn (dezınfektsııalyq quraldar) zańsyz esepten shyǵarý jolymen senip tapsyrylǵan múlikti jymqyrǵan.
«Sonymen qatar laýazymdy qyzmetkerler sol qarasha, jeltoqsanda 1 mln 186 myń teńge kólemindegi syıaqylar men isssapar shyǵyndarynyń zańsyz jınalýyn júzege asyrǵan», - delingen baspasóz habarlamasynda.
Budan bólek, olardyń zańsyz is-áreketteri saldarynan jumysty tólemaqysyz jáne úshinshi tulǵalar úshin oryndaý jolymen memleketke 1,5 mln teńge zalal keltirilgen.
«Tergeý jumystary jalǵasýda», - dep atap ótti departamentten.
