BQO Bórli aýdanynda sý tasqynan zardap shekkenderdi baspanamen qamtamasyz etý máselesi 100 paıyz sheshildi
AQSAI. KAZINFORM — Memleket basshysy sý tasqynynan zardap shekken turǵyndarǵa tıisti kómek kórsetýdi tapsyrǵan bolatyn. Osy oraıda kóktemgi sý tasqyny saldarynan Bórli aýdany boıynsha barlyǵy 126 úı apatty dep tanyldy. Sonyń ishinde 66 turǵyn úı ıesi úshin páterler satyp alynyp, qalǵan 60 úı ıesi úshin turǵyn úı qurylystary júrgizildi.
Nátıjesinde Aqsý aýylynda – 23, Keńtúbek aýylynda – 11, Pýgachev aýylynda – 12, Araltal aýylynda 14 turǵyn úıdiń qurylysy ústimizdegi jyldyń 22 mamyry kúni bastalyp, josparǵa sáıkes 1 tamyzǵa deıin aıaqtaldy.
«Memleket basshysy Qasym-Jomart Toqaevtyń tapsyrmasyna sáıkes sý tasqynynan zardap shekken turǵyndarǵa zań aıasynda tıisti kómek kórsetilip jatyr. Búginde turǵyndarǵa 100 AEK birjolǵy áleýmettik kómek jáne dúnıe-múlikteri úshin 150 AEK tólemderi tolyǵymen óteldi. Sonymen qatar sý tasqyny zardabyn tıgizgen úılerdiń 90 paıyzynan astamyna turǵyn úıin jóndeýge jáne qalpyna keltirýge ótemaqy berildi. Keshe ǵana úılerinen aıyrylyp, qapyda qalǵan turǵyndar búgin jańa baspanaǵa ıe bolyp jatyr. Qazirgi tańda oblysymyzda myńnan astam baspana satyp alynyp, sý tasqynynan zardap shekken otbasylarǵa berildi. Sonymen qatar 775 turǵyn úıdiń qurylysy qarqyndy júrgizilip, endi qurylysy aıaqtalǵan úılerdiń halyq ıgiligine berilý sátiniń kýási bolyp otyrmyz», - dedi óńir basshysy.
Qurylys jumystary «Aqsaıgazservıs» AQ, «Aqjaıyq», «Demeý» qorlary jáne «Qazaq Stroy Almaty» JShS demeýshiligimen júrgizildi. Jalpy qarjylandyrý kólemi 1,6 mlrd teńge.
Pýgachev aýylynyń turǵyndary Imanalıevter otbasy jalǵyz baspanasy sýǵa ketip, jaramsyz dep tanylýyna oraı, olar jańa páterdiń ıesi atandy.
«Pýgachev aýylyna 2006 jyly otbasymyzben kóship kelip, úı salyp aldyq. Sol salǵan úıimizdi naýryz aıynyń aıaǵynda tasqyn sý basty. Degenmen, arada kóp ýaqyt ótpeı búgin baspanaly bolyp jatyrmyz. Jaryq, keń 3 bólmeli, úlken, barlyq jaǵdaıy jasalǵan baspanaǵa qol jetkizgenimizge óte qýanyshtymyz. Osyndaı jaǵdaı jasaǵan Memleket basshysyna alǵysymdy bildiremin», - dedi Imanalıeva Aqkenje.
Búginde Bórli aýdanynda sý tasqynynan zardap shekkenderdi baspanamen qamtamasyz etý máselesi 100 paıyz sheshildi.
