BQO: Bókeı ordasy men Jánibek baǵytyndaǵy jol qurylysy 2023 jyly aıaqtalmaq
«QazAvtoJol» UK» AQ BQO fılıalynyń dırektory Ámir Kárimbaevtyń óńirlik kommýnıkatsııalar qyzmeti alańynda ótken brıfıngide málim etkenindeı, uzyndyǵy 248 shaqyrymdy qamtıtyn respýblıkalyq mańyzy bar Kaztalov-Jánibek-RF shekarasy jáne Ónege-Bısen-Saıqyn avtojoldarynda kúrdeli jóndeý jumystary bıyl jalǵasady.
Onyń aıtýynsha, atalmysh jol qurylysyn osyǵan deıin aıaqtaý josparlansa da, ony bitirý múmkin bolmady. Onyń basty sebepteri – qarjynyń tolyq bólinbeýi, pandemııaǵa baılanysty merdiger kompanııalar jumysshylarynyń indetke shaldyǵýy, jaýyn-shashynnyń mólsherden kóp túsýi, ınertti materıaldardy tasymaldaýdaǵy qıyndyqtar jáne qurylys materıaldarynyń qymbattaýy.
Á.Kárimbaevtyń sózine qaraǵanda, jol salý bastalǵan úsh jyldan beri 23 mıllıardtaı qarjy ıgerilgen. Sonyń ishinde ótken jyly 20 mlrd teńge bólinse, sonyń teń jartysyna jýyǵyn basqa jobalarǵa berýge týra kelgen. Bıylǵa 10 mlrd teńge qarastyrylsa, aldaǵy ýaqytta sondaı kólemde qosymsha qarjy suralatyn bolady. Osy jobany tolyqtaı aıaqtaý úshin barlyǵy 57 mlrd teńgeni ıgerý josparlanǵan.
«Bıyl alty kúrdeli jóndeý nysanyna 5 merdigerlik kompanııa tartylǵan. Kaztalov-Jánibek-RF shekarasy avtojolynyń 53-95 shaqyrymy bóligi boıynsha óz mindettemesin oryndamaǵan merdiger «Temirjol jóndeý» JShS-men ótken jyldyń sońynda kelisimshart buzyldy. Bul jol ýchaskesi «QazAvtoJol» JShS-ǵa kútip ustaý úshin tapsyryldy. Qazirgi tańda jańa merdiger kompanııany anyqtaý boıynsha konkýrstyq rásimderdi jarııalaý úshin daıyndyq jumystary júrgizilýde. Bes ýchaskede merdiger kompanııalardyń 4 topyraq aralastyrǵysh qurylǵysy men 4 asfaltbeton zaýyty tolyq daıyn. Sonymen qatar barlyq ýchaskede merdigerlerdiń jeke zerthanalary jumys isteıdi. Bıylǵy jol qurylysyna 388 jol-qurylysy tehnıkasy men 582 jumysshyny tartý josparlansa, sonyń 85 paıyzy – jergilikti turǵyndar», dedi Á.Kárimbaev.
Sonymen qatar qardyń erýine baılanysty Kaztalov-Jánibek jáne Ónege-Bısen-Saıqyn joldarynda qatynastyń qıyndap ketkeni belgili. Ásirese, Kaztalov-Jánibek-RF shekarasynyń 25-28 shaqyrymynda jáne Ónege-Bısen-Saıqyn jolynyń 6-20 shaqyrymynda laısań ýaqytta jol júrý múmkin bolmaı qaldy. Osy máseleni sheshý maqsatynda merdiger uıymdardyń qyzmetkerleri 36 arnaıy tehnıkamen táýlik boıy kezekshilik jumystaryn atqarýda.
Eske sala keteıik, budan buryn Bókeı ordasy men Jánibek aýdanyna jol salý jumysy kesheýildep otyrǵanyn jazǵan bolatynbyz.