BQO: Berezov aýylynyń balalary «Aqjaıyqta» demalady
ORAL. QazAqparat - Oblys ákimi Nurlan Noǵaevtyń tapsyrmasyna sáıkes Bórli aýdany Berezov aýylyndaǵy orta mektep balalary óńirdegi «Aqjaıyq» shıpajaıynda demalady.
Oblystyq bilim basqarmasy basshysynyń orynbasary Nurlan Sabyrovtyń habarlaǵanyndaı, búgin tańerteń Terekti aýdanyndaǵy atalmysh shıpajaıǵa 7-8 synypta oqıtyn alǵashqy 20 bala keldi. Sondaı-aq olarmen birge pán muǵalimderi de ornalasatyn bolady. Bul balalardyń sabaqtan qol úzbeýi úshin jasalyp otyr. 12 jeltoqsanda shıpajaı taǵy 70-80 adamdy qabyldamaq. Sonda Berezov orta mektebiniń barlyq 170 oqýshysy tynyǵyp shyǵatyn bolady.
Eske sala keteıik, 28 qarasha kúni Bórli aýdandyq aýrýhanasyna Berezovtan 25 bala, tórt eresek adam túsken bolatyn.
BQO densaýlyq saqtaý basqarmasy ana men bala densaýlyǵyn qorǵaý bóliminiń bas mamany Gúlmıra Saqýovanyń aıtýynsha, 28 qarashadan beri medıtsınalyq kómekke 91 adam júgingen. Qazirgi kezde bes bala emdelýde bolsa, sonyń úsheýi oblystyq kópbeıindi balalar aýrýhanasynda. Báriniń de jaǵdaıy turaqty, beti beri qarady. Oqıǵa ornynda quramynda psıholog pen pedıatr bar arnaıy top jumys jasaýda.
Medıtsınalyq kómek alǵandardyń aǵzasyna zııandy hımııalyq zattardyń engen-enbegendigin anyqtaý maqsatynda synamalar alynyp, bular Astana qalasynda sot hımııa-toksıkologııalyq jáne sot-medıtsınalyq saraptamadan ótkiziletin bolady. Sot-ekologııalyq saraptama júrgizý úshin de qajetti synamalar alyndy.
BQO ákimi baspasóz qyzmetiniń atap ótkenindeı, Berezov turǵyndary munyń Qarashyǵanaq kenishi áseri ekenine senimdi bolǵanymen, komıssııa jumysyn aıaqtaǵan joq. Sondyqtan túpkilikti qorytyndy keıin habarlanatyn bolady.
