BQO: Barlyq saılaý ýchaskesine baıqaýshy bekitiledi (FOTO)
ORAL. QazAqparat - Oblysta 520 saılaý ýchaskesi bolsa, sonyń árqaısysyna saılaýdy baqylaý jónindegi respýblıkalyq qoǵamdyq komıssııa fılıalynan bir-bir baıqaýshydan bólinedi. Bul týraly búgin Ortalyq kommýnıkatsııalar qyzmetiniń óńirlik fılıalynda oblystyq komıssııa tóraıymy Vera Shohına málim etti.
Onyń aıtýynsha, sonyń ishinde Oral qalasynda 117 saılaý ýchaskesi bar. Burynǵy baıqaýshylardyń negizgi quramy saqtalady. Negizinen joǵary oqý oryndary oqytýshylary men mektep muǵalimderi osy qoǵamdyq jumysty atqarady. Ótken jylǵy saılaýda olar belsendilik kórsetip, belgili bir zańbuzýshylyq bolsa, sol boıda habarlap, oblystyq saılaý komıssııasy arqyly tıisti sharalar alynyp otyryldy.
Qazirgi tańda osy salada tájirıbesi bar qoǵam belsendilerinen, úkimettik emes uıymdar jáne basqa sala ókilderinen qurylǵan oblystyq komıssııa óz jumystaryn bastap, shtab quryldy. Komıssııa saılaý barysyna saraptama júrgizip, onyń ashyqtyǵy men jarııalylyǵyn, zańnamanyń saqtalýyn qamtamasyz etýdi kózdeıdi. Dodaǵa túsetin ár úmitkerdiń quqyǵy buzylmaı, olardyń bárine teń jaǵdaı jasalýy qadaǵalanady. Saılaýshylardyń da saılaý kúni ýchaskege kelip, óz tańdaýyn jasap, saılaýdyń zańǵa sáıkes ótkizilýine erekshe mán beriledi.
Baıqaýshylardy oqytý baǵytynda semınarlar men trenıngter uıymdastyrylady. Baıqaýshyǵa qoıylatyn basty talap - ol saılaý týraly zańnamany múltiksiz bilýi tıis. Oqýdyń qorytyndysy boıynsha testileý ótkizilip, ár baıqaýshyǵa arnaıy ádistemelik quraldar men baıqaýshy bloknoty beriledi.
«Eń bastysy, qandaıma bolsyn zańbuzýshylyqtyń aldyn alyp, boldyrmaýǵa basa nazar aýdarylady. Osy baǵytta saılaý komıssııalary múshelerimen, saıası partııalardyń saılaýaldy shtabtarynyń ókilderimen kezdesemiz. Mundaı jumystar tek oblys ortalyǵynda ǵana emes, aýdandarda da júrgiziledi. Ótken jyldardaǵy saılaý naýqandarynyń tájirıbesin eskere otyryp, barlyq daýly máselelerdi naqty sheshýge atsalysatyn bolamyz», - dedi V.Shohına.
