BQO balalar men jasóspirimder kitaphanasyna Hamza Esenjanovtyń esimi berildi
ORAL. QazAqparat - QR Úkimetiniń 2016 jylǵy 20 jeltoqsandaǵy №827 qaýlysyna sáıkes Batys Qazaqstan oblystyq balalar men jasóspirimder kitaphanasyna qazaqtyń kórnekti jazýshysy, Memlekettik syılyqtyń ıegeri Hamza Esenjanovtyń esimi berildi, dep habarlaıdy «QazAqparat» HAA tilshisi.
Qazirgi Terekti aýdanyndaǵy Shalqar kóliniń jaǵasynda 1908 jyly dúnıege kelgen Hamza Esenjanovtyń basty shyǵarmasy - «Aq Jaıyq» trılogııasy. 1938 jyly jalǵan saıası aıyp taǵylyp, jıyrma jylǵa jýyq stalındik qýǵyn-súrginniń azabyn tartqan qalamger atalmysh kitabyn túrmede jatqanda qaıyńnyń qabyǵyna jazyp, kópshik tysyna salyp, saqtaǵan. Bostandyqqa shyqqannan keıin trılogııanyń birinshi kitaby 1957 jyly, ekinshisi 1959 jyly, úshinshisi 1965 jyly jaryq kórdi. Aq Jaıyq óńirindegi ótken ǵasyrdaǵy qazan tóńkerisinen keıingi tutas dáýirdi shynaıy beınelegen osynaý týyndy úshin avtorǵa 1967 jyly Memlekettik syılyq berildi. Jazýshy stalındik zulmat kezeńniń shyndyǵynan habar beretin «Aǵaıyndy Júnisovter» romanyn da jazdy. Jazyqsyz qýǵyndalyp, túrmede tartqan azaptyń saldarynan H.Esenjanov 1974 jyly Almatyda ómirden ozdy.
Atalmysh kitaphana budan buryn orys jazýshysy Arkadıı Gaıdardyń esimin ıelengen bolatyn. Rýhanııat ortalyǵyna Hamza Esenjanovtyń atyn berý týraly usynystyń jasalǵanyna biraz bolǵanymen, resmı túrde bekitilmeı kelgen edi.
Eske sala keteıik, Batys Qazaqstan oblystyq qazaq drama teatryna Aq Jaıyqtan túlep ushqan taǵy bir tarlan talant, KSRO jáne Qazaqstan halyq ártisi Hadısha Bókeevanyń esimin berý týraly da kópten aıtylyp keledi. «Aldaǵy jyly Hadısha Bókeevanyń týǵanyna 100 jyl tolmaq. Osyǵan oraı teatrǵa ataqty aktrısanyń esimin berý týraly Úkimetke usynys berilmekshi», dedi bul jóninde «QazAqparat» tilshisine oblys ákimi Altaı Kólginov. 
