BQO aýylynda 10-15 kún ishinde onshaqty adam kóz jumdy – aqparat jalǵan

ORAL. QazAqparat – Áleýmettik jelide Batys Qazaqstan oblysy Bókeı ordasy aýdany Han ordasy aýylynda sońǵy 10-15 kún ishinde onshaqty adam aıaq astynan, belgisiz jaǵdaıda dúnıe saldy degen aqparat taraǵan bolatyn. Osyǵan oraı BQO densaýlyq saqtaý basqarmasy túsinik berdi, dep habarlaıdy QazAqparat tilshisi.

BQO densaýlyq saqtaý basqarmasynan málim etkenindeı, atalǵan aýylda onshaqty adam 10-15 kún ishinde emes, bıylǵy qańtar aıynan beri qaıtys bolǵan.

«Bıylǵy alty aıda Han ordasy aýylynda 14 adam (ótken jyly osy merzimde – 13) kóz jumǵan. Mysaly, maýsymda 4, mamyrda 2, qańtarda 4 adam ómirden ótken. Atap aıtqanda, bireýi jol-kólik oqıǵasy saldarynan mert boldy. Tórteýi arterıaldyq gıpertenzııa, bireýi uıqy bezi qaterli isigimen dıspanserlik esepte turdy. 1 adam tamaqtaný kezinde tunshyǵyp qalǵan. Bireýi izdestirýde bolyp, Atyraý oblysy aýmaǵynda belgisiz jaǵdaıda qaıtqan. Bireýi 2003 jyldan beri Reseıde turyp kelgen, ony týystary bıyl naýryz aıynda Han ordasyna aýyl halde jetkizgen. Úsh adam júrektiń sozylmaly ıshemııalyq aýrýyna shaldyqqan, olardyń bireýi dalada mal baqqandyqtan, medıtsınalyq tekserýge kelmegen. Taǵy bireýi baýyrdyń alkogoldik tsırrozymen esepte turyp, tekserýden ótip júrgen. Arterıaldyq gıpertenzııamen jáne qant dıabetimen aýyrǵan bir turǵyn araq iship, qan qysymy kóterilgendikten, medıtsınalyq járdem brıgadasymen oblystyq kópbeıindi aýrýhanaǵa jetkizilgen. 13 kún em alǵanymen, beti beri qaramady. Bókeı ordasy aýdanyndaǵy aýyldardaǵy barlyq medıtsınalyq mekemelerdi aralap, qyzmetimen tanysqan BQO densaýlyq saqtaý basqarmasynyń basshysy Erlan Toqsanov aqparatty taratqan Han ordasynyń turǵynymen jeke júzdesip, máseleniń mán-jaıy boıynsha áńgimelesti», dep habarlady búgin vedomstvodan.