BQO aýrýhanasynda patsıentter úshin jaǵdaı jasalmaǵany ras pa

ORAL. KAZINFORM — Oral qalasyndaǵy oblystyq juqpaly aýrýlar aýrýhanasynda emdelýshiler úshin jaǵdaı jasalmaǵany týraly beınejazba tarady. 

Beınejazbada er adam «Juldyz» shaǵynaýdanynda ornalasqan aýrýhanada balasymen jatqanyn aıtady.

— Tamaǵy tamaq emes, túrmeniń asynan da nashar. Tósek jamylǵylaryna on jyl bolǵan, tozǵan. Ýnıtazda sý toqtaýsyz aǵyp jatyr. Jatqanymyzǵa úshinshi kún boldy, ystyq sý joq. Dýshqa jýyna almaımyz. Ájethana qaǵazyna deıin úıden ákelemiz. Jaǵdaı osy, — deıdi turǵyn.

Osyǵan oraı Kazinform tilshisi BQO densaýlyq saqtaý basqarmasyna arnaıy saýal joldaǵan edi. 

Basqarmadan kelgen málimetke qaraǵanda, másele oblystyq juqpaly aýrýlar aýrýhanasynyń patsıentterdi qoldaý jáne ishki baqylaý qyzmetimen qaralǵan.

Bala aýrýhanaǵa naqtylanbaǵan vırýsty ishek juqpasy dıagnozymen jatqyzylǵan. Júrgizilgen emdeý is-sharalary klınıkalyq hattama talaptaryna sáıkes keledi. Dıagnozyna sáıkes balaǵa «№ 4 ústel» emdeý taǵamy taǵaıyndalǵan. Bul taǵam qatań medıtsınalyq dıetaǵa jatady jáne ótkir ishek aýrýlary kezinde qoldanylady.

Basqarma derekterine sáıkes oblystyq juqpaly aýrýlar aýrýhanasy men «AirFood» JShS arasynda patsıentter tamaǵyn uıymdastyrý qyzmetin kórsetý úshin memlekettik satyp alý týraly kelisim-shart jasalǵan. Kelisim-shart memlekettik satyp alý salasyndaǵy zańnama, sondaı-aq medıtsına uıymdarynda emdik taǵam máselelerin retteıtin normatıvtik-quqyqtyq aktiler talaptaryna sáıkes oryndalady. Qazirgi kezde kelisim-shartty úzý úshin negizder joq.

Degenmen beınejazbada aıtylǵan eskertpeler qaterge alynyp, qoldanystaǵy kelisim-shart aıasynda taǵam sapasyn jaqsartý boıynsha sharalar alý úshin ónim jetkizýshige jiberildi. 

— Bólimshede ystyq sýdyń ýaqytsha bolmaýy jóndeý-qalpyna keltirý jumystarynyń júrgizilýine baılanysty ekendigin habarlaımyz. Qazirgi ýaqytta qyzmet kórsetýshi kompanııa belgilengen tártippen jumystardy jalǵastyryp jatyr. Ol patsıentterdiń sanıtarlyq-turmystyq jaǵdaıyn jaqsartýǵa baǵyttalǵan. Jumys bitkennen keıin ystyq sý beriledi, — delingen resmı málimette.

Eske sala keteıik, budan buryn BQO-da qalalyq medıtsına uıymdarynda 116 maman jetispeıtinin jazǵan edik.