BQO aýrýhanasynda qordalanǵan qaryz 2 mlrd teńgeden asty

Aýrýhana dırektory Erlan Toqsanovtyń málim etkenindeı, bıylǵy 1 qazandaǵy málimet boıynsha qordalanǵan qaryz 2 mlrd teńgeden asady.

Erlan Vılenulynyń sózine qaraǵanda, munyń negizgi bóligi 2026 jyly dárilik zattar men medıtsınalyq maqsattaǵy buıymdardy satyp alýmen, qymbat medıtsınalyq jabdyqtardy jóndeýmen jáne tehnıkalyq qyzmet kórsetýmen, sondaı-aq aldyńǵy kezeńderdegi medıtsınalyq maqsattaǵy buıymdardy jekelegen jetkizýshiler aldyndaǵy bereshekpen baılanysty. Kredıtorlyq bereshek 2022 jyldan bastap qalyptasqan.

— Dárilik zattar, medıtsınalyq buıymdar, kommýnaldyq qyzmetter, jabdyqqa tehnıkalyq qyzmet kórsetý jáne basqa da qajetti qyzmetter quny jyl saıyn ósip otyr. Negizgi sebep te medıtsınalyq uıymnyń aǵymdaǵy shyǵystaryn jabý úshin qoldanystaǵy tarıfterdiń jetkiliksizdigine baılanysty. Atap aıtqanda, emdelgen patsıent úshin medıtsınalyq qyzmetterge aqy tóleý kezinde qoldanylatyn klınıkalyq-shyǵyndy toptardyń quny 2019 jyldan beri qaıta qaralǵan joq. Tarıfterdiń kezeń-kezeńimen ózgerýi 2025 jyldyń sońynda bastaldy, — deıdi Erlan Toqsanov.

Onyń aıtýynsha, dárilik zattar men medıtsınalyq buıymdarǵa jumsalatyn shyǵyndar kóbeıgen. Satyp alý baǵalary, sondaı-aq patsıentter sanynyń ósýine, aýrýlardyń aýyrlyǵyna jáne qatar júretin patologııalardyń bolýyna baılanysty preparattar men shyǵyn materıaldaryna qajettilik artady.

Sonymen qatar qymbat medıtsınalyq tehnıkany jóndeý jáne tehnıkalyq qyzmet kórsetý shyǵyndary jyl saıyn ósip otyr. Oǵan qosa elektr energııasynyń quny kVt/saǵ úshin 33,69-dan 90,91 teńgege deıin, sýmen jabdyqtaý 789-dan 1 133 teńgege deıin, sý burý 908-den 1 236 teńgege deıin ulǵaıdy. Sýdy jylytý quny ár sharshy metr úshin 23 085,1 teńgeden 52 466,93 teńgege deıin jetti.

Aýrýhana málimetine sáıkes ınternet shyǵyndary 2022 jyly — 5,045 mln, al ótken jyly 14,082 mln teńge boldy. Bıyl da osy deńgeıde saqtalady. Medıtsınalyq aqparattyq júıege qol jetkizýdi usyný boıynsha qyzmetterdiń quny 11,07 paıyzǵa artty.

Bıylǵy 1 qańtardan bastap qosylǵan qun salyǵynyń stavkasy 12-den 16 paıyzǵa deıin ósti, bul satyp alynǵan taýarlar men qyzmetterdiń baǵasyna áser etti.

Sondaı-aq 2024 jyldyń qarasha aıynan beri aýrýhana medıtsına qyzmetkerleriniń kásibı jaýapkershiligin mindetti saqtandyrýǵa arnalǵan qosymsha shyǵyndar kóterilip keledi. 2025 jyly osy bap boıynsha shyǵyndar 10,97 mln teńge boldy, bul rette jyldyq qajettilik 13,6 mln teńgeden astamǵa baǵalanady.

Jumys berýshiniń mindetti zeınetaqy jarnalaryna 2025 jyldan bastap qosymsha mindetti aýdarymdardyń engizilýine baılanysty 579 qyzmetkerge ketetin aı saıynǵy shyǵystar 8,3 mln, jylyna 99,7 mln teńgege jetti. Sol sekildi qyzmetkerlerdiń ómirin saqtandyrýǵa buryn 5,4 mln teńge jumsalsa, 2025 jyldan bastap bul shyǵys 21,99 mln teńge boldy.

— Medıtsınalyq uıymnyń qarjylyq júktemesiniń artýyna osyndaı faktorlar áser etip otyr. Jalpy, aýrýhana qalypty jumys istep tur. Operatsııalyq qyzmetterdiń jumysyn jáne patsıentterge shuǵyl hırýrgııalyq kómek kórsetýdi toqtatý qaýpi joq. Qajetti shyǵyn materıaldary satyp alyndy. Qazirgi ýaqytta másele jetkizilgen ónimder men kórsetilgen qyzmetter úshin jetkizýshilerge tólemderdi ýaqytyly tóleýge qatysty bolyp otyr, — dep túıindedi sózin Erlan Toqsanov.

Jýyrda aýrýhanaǵa qarjylaı qoldaý kórsetý týraly másele oblystyq máslıhattyń sessııasynda talqylanyp, depýtattar tarapynan qoldaý tapty. Naqty aıtqanda, qyzmet berýshimen kórsetiletin qyzmetterdi satyp alý sharty boıynsha kózdelgen somadan asyp ketken 300 mln teńgeni jergilikti bıýdjet esebinen tóleý usynyldy.

Eske sala keteıik, budan buryn Batys Qazaqstanda 2 100-den astam áıeldiń sút bezi obyrymen esepte turǵanyn jazǵan edik.