BQO aýrýhanasy sapasyz qyzmet úshin marqumnyń týystaryna ótemaqy tóleıtin boldy
ORAL. KAZINFORM — Batys Qazaqstan oblysy Báıterek aýdanynyń № 2 aýrýhanasynan medıtsınalyq qyzmetti tıisinshe kórsetpegeni úshin talapkerlerdiń paıdasyna ótemaqy óndirildi.
BQO sotynyń baspasóz qyzmetinen málim etkenindeı, marqumnyń áıeli men uly árqaısysynyń paıdasyna 10 mln teńge kóleminde moraldyq zııannyń ótemaqysyn óndirý týraly sotqa júgindi.
Talap aryzda er adam Báıterek aýdanynyń №2 aýrýhanasynda dárigerdiń baqylaýynda bolyp, 2023 jylǵy jeltoqsannan 2024 jylǵy 15 tamyzǵa deıin em qabyldady, alaıda oǵan sapasyz medıtsınalyq kómek kórsetildi delingen. Oǵan medıtsınalyq kómektiń buzýshylyqtarmen kórsetilgeni tekserý materıaldarymen rastalady. Atap aıtqanda, jalpy tájirıbe dárigeri zerthanalyq zertteýler nátıjelerin tıisinshe túsindirmegen. Densaýlyq saqtaý mınıstrligi dıagnostıka jáne emdeý hattamalarynyń usynymdary saqtalmaǵan. Patsıent beıindi mamandardyń (gastroenterolog, ınfektsıonıst, gepatolog, hırýrg, travmatolog) konsýltatsııalaryna ýaqtyly jiberilmegen. Sondaı-aq patogıstologııalyq qorytyndy alynǵannan keıin onkologqa der kezinde joldama berilmegen. Keıin ol onkologııalyq dertten kóz jumǵan.
Sot otyrysynda jaýapker – Báıterek aýdanynyń №2 aýrýhanasy ókili talap qoıýdy moıyndamaı, medıtsınalyq qyzmetterdiń tolyq kólemde kórsetilgenin jetkizdi. Saraptamalardyń qorytyndylary aýrý men medıtsına qyzmetkerleriniń áreketteri arasynda sebeptik baılanys bar ekenin rastamaıdy, aýrý jasyryn túrde damyp, boljamy qolaısyz bolǵanyn kórsetti. Jazbasha pikir usynyp, talap aryzdy tolyq kólemde qanaǵattandyrýdan bas tartýdy surady.
Sotta dáriger de talap aryzben kelispeıtinin bildirdi. Naýqas qara tústi nájis pen qusýǵa shaǵymdanyp júgingen. Oǵan FGDS-dan ótý jáne qan tapsyrý usynylǵan. Buǵan deıin patsıent skrınıngten ótken. Qabyldaýǵa ózi bir ret kelgen, keıin jubaıy kelgen. Naýqastyń jaǵdaıy nasharlaǵan kezde úı jaǵdaıynda patronaj júrgizilgen. Dıagnoz ýaqytyly qoıylmaǵanymen, jalpy qan taldaýynyń nátıjeleri asa qaýipti bolmaǵan. Óz tarapynan qoldan kelgenniń barlyǵyn jasaǵanyn aıtyp, talap aryzdy qanaǵattandyrýdan bas tartýdy surady.
Sot talap qoıýshynyń medıtsına qyzmetkerleriniń óz laýazymdyq mindetterine adal qaramaýy, medıtsınalyq kómek kórsetý standarttaryn buzýy týraly ýájderin negizdi dep eseptedi. Oǵan qosa zerthanalyq taldaýlardaǵy ózgeristerge der kezinde nazar aýdarylmaǵan. Naýqastyń shaǵymdary men densaýlyq jaǵdaıynyń údemeli nasharlaýyna mán berilmeýi onkologııalyq aýrýdyń kesh anyqtalýyna jáne er adamnyń kenetten qaıtys bolýyna ákep soqtyrǵan.
Báıterek aýdanynyń №2 aýrýhanasy dárigeriniń áreketterinen talap qoıýshylarǵa moraldyq zııan keltirilgen dep esepteıdi, óıtkeni marqumǵa sapasyz qyzmet kórsetilgen. QR Azamattyq kodeksiniń 921-babyna sáıkes medıtsına qyzmetkerleri jibergen buzýshylyqtar úshin jaýapkershilik aýrýhanaǵa júkteledi.
- Sot talap qoıýshylardyń eń jaqyn adamy – ákesi men jubaıynan aıyrylýy saldarynan úlken qaıǵy-qasiret shekkenin eskerip, moraldyq zııandy óteý týraly talaptaryn ishinara qanaǵattandyrý qajet dep tapty. Olardyń árqaısysynyń paıdasyna moraldyq zııannyń ótemaqysy retinde 700 myń teńgeden óndirýge sheshim qabyldady. Sheshim zańdy kúshine engen joq, - dep habarlady vedomstvodan.
Eske sala keteıik, budan buryn BQO-da alaıaqtyq jasaǵan sheneýnikke 7 mln teńge aıyppul salynǵanyn jazǵan edik.
