BQO aýyldarynyń vetpýnktpen qamtylý kórsetkishi 50 paıyzǵa jetpeıdi

ORAL. KAZINFORM — Batys Qazaqstan oblysy aýyldarynda 147 veterınarııalyq pýnkttiń 71-i óz ǵımarattarymen qamtylǵan.

BQO veterınarııa basqarmasynyń basshysy Abzal Bralıevtiń aıtýynsha, 76 vetpýnktke aýyldyq okrýgter ákimdikterinde bólme berilgen. Jalpy, oblys boıynsha aýyldardyń vetpýnktpen qamtylý kórsetkishi – 48 paıyz.

Onyń sózine qaraǵanda, ótken jyly 4 veterınarııalyq pýnkt salynsa, bıyl Shyńǵyrlaý, Syrym, Tasqala jáne Báıterek aýdandarynda taǵy 7 ǵımarat paıdalanýǵa berildi.

- Jańadan salynǵan veterınarııalyq pýnktter vaktsınalar men bıopreparattardy saqtaýǵa arnalǵan tońazytqyshtar, hırýrgııalyq jıyntyq, termochemodan, kompıýter syndy quraldarmen tolyqtaı jabdyqtalǵan. Jyl sońyna deıin qosymsha jańadan 21 vetpýnkt iske qosylady, - dedi A.Bralıev.

Onyń málimdeýinshe, qazirgi ýaqytta oblysta veterınarııalyq is-sharalardy Oral qalalyq jáne 12 aýdandyq veterınarııalyq stantsııalar atqarady. Veterınarııalyq stantsııalar quramynda 147 aýyldyq veterınarııalyq pýnkt bar.

- Shtattyq qurylymda 824 qyzmetker bolsa, sonyń 643-i – veterınar mamandar, 181-i – ákimshilik qyzmetshiler. 2022 jyldan beri veterınar mamandardyń eńbekaqysy kezeń-kezeńmen ósti. 2023 jyldan bastap mal dárigerlerine patogendi bıologııalyq agenttermen jumys úshin 50 paıyzǵa deıin qosymsha eńbekaqy jáne eńbek demalysyna shyǵý kezinde eki laýazymdyq jalaqy mólsherinde saýyqtyrý járdemaqysy tólenedi. Qazir veterınar dáriger eńbek ótiline qaraı ortasha eseppen 309-320 myń, feldsher 244-256 myń, sanıtar 160-190 myń teńge jalaqy alady, - dedi basqarma basshysy.

Eske sala keteıik, budan buryn Batys Qazaqstanda 3 iri qara maldan qutyrý aýrýy tabylǵanyn jazǵan edik.