BQO aýyldarynda jańadan tórt mádenıet úıi salynyp jatyr
ORAL. KAZINFORM – Batys Qazaqstan oblysy aýyldarynda jańadan tórt mádenıet úıi salynyp jatyr.
BQO ákiminiń orynbasary Baqytjan Narymbetovtiń málim etkenindeı, Jańaqala aýdanynyń Qyrqopa, Syrymnyń Toǵanas, Báıterektiń Şapov jáne Kaztalovtyń Qaıyńdy aýyldarynda mádenıet oshaqtary boı kóterýde.
Baqytjan Haberulynyń sózine qaraǵanda, ótken jyly Bókeı ordasynyń Bısen, Tasqalanyń Mereı aýyldarynda mádenıet úıleri ashylǵan bolatyn. Oǵan qosa Syrymnyń Alǵabas, Aqjaıyqtyń Mergen jáne Bókeı ordasynyń Han ordasy aýylynyń mádenıet úıleri de jańaryp qaldy.
«Jobasyna ózgeris engizilgen soń Oral qalasyndaǵy Hadısha Bókeeva atyndaǵy oblystyq qazaq drama teatry ǵımaratyn kúrdeli jóndeý jumystary jalǵasady. Aleksandr Ostrovskıı atyndaǵy orys drama teatryn kúrdeli jóndeý úshin joba jasaqtalyp, qarajat bólindi. Jóndeý zaýyty aýdanyndaǵy oblystyq halyq shyǵarmashylyǵy ortalyǵy da retke keltiriledi. Bıyl atalmysh ortalyq 80 jyldyq mereıtoıyn atap ótýde. Budan bólek, Bórli aýdanynda Jarsýat, Keńtúbek jáne Býmakól aýyldyq mádenıet úıleri kúrdeli jóndeýden ótkiziledi. «QPO b.v.» kompanııasynyń áleýmettik ınvestıtsııalary esebinen Oraldaǵy Jastar mádenıet saraıy men Derkól kentindegi mádenıet úıi kúrdeli jóndeledi. Bul jumystar jazda bastalyp, kúzde aıaqtalady», dedi B.Narymbetov.
Ákim orynbasarynyń aıtýynsha, óńirdegi kitaphanalar da erekshe nazarda. Bıyl Syrym aýdanynda kitaphana ǵımaratynyń qurylysy bastalady. Qazirgi kezde merdiger uıym anyqtaldy.
«Qazaqstan halqyna» qorymen birlese otyryp, elimizde alǵash ret «Aýyl kitaphanalaryn modernızatsııalaý» jobasyn júzege asyrmaqshymyz. Onyń aıasynda 25 aýyldyq kitaphanany qaıta jańǵyrtý jumystaryn júrgizemiz. Bıylǵy jyly Aqjaıyq jáne Jańaqala aýdandyq kitaphanalary qaıta jańǵyryp, óz jumysyn bastaıtyn bolady», deıdi B.Narymbetov.
Oblystaǵy tarıhı Bókeı ordasy aýdanyndaǵy Han ordasy mýzeı-qoryǵynda ótken jyly vızıt ortalyǵy men ákimshilik ǵımarat jańadan salynsa, bıyl han saraıy men qazynashylyq úıine restavratsııalaý jumystary júrgiziledi.
«Memleket basshysynyń kreatıvti ındýstrııany damytý jónindegi tapsyrmasyna sáıkes Oraldaǵy jańǵyrtylatyn Jastar mádenıet úıinde «Samuryq Qazyna Trast» qorymen kreatıv hab alańyn ashýdy josparlaýdamyz. Ótken jyly Syrym aýdanynda Syrym Datuly atyndaǵy tarıhı-ólketaný mýzeıine berilgen ǵımarat kúrdeli jóndeýden ótkizilip, bıyl ekspozıtsııalardyń jańadan jasaqtalýy óńirdegi erekshe oqıǵa boldy», dedi B.Narymbetov.
