BQO aýyldarynda 50-den astam emhana, 20-dan astam mektep ashyldy

ASTANA. KAZINFORM – Batys Qazaqstan oblysynyń ákimi Narıman Tóreǵalıev densaýlyq saqtaý, bilim berý, sport jáne mádenıet salalaryn damytý qarqyny týraly baıandady.

Onyń aıtýynsha, «Aýylda densaýlyq saqtaýdy jańǵyrtý» ulttyq jobasy aıasynda 50 medıtsınalyq nysan ashylyp, úsh jylda 442 dáriger tartyldy, onyń 236-sy aýyldarǵa jiberildi.

– Bıyl Qaztalov jáne Bórili aýdandarynda aýrýhanalardyń qurylysy bastaldy. Medıtsına salasynyń materıaldyq-tehnıkalyq jaǵdaıyn jaqsartýǵa 5,1 mlrd teńge bólinip, 100-ge jýyq zamanaýı medıtsınalyq qural-jabdyq alyndy. Bul jumystar nátıjesinde oblystaǵy medıtsınalyq jabdyqpen jaraqtandyrý deńgeıi 83,8%-ǵa jetti, – dedi N.Tóreǵalıev elordada Ortalyq kommýnıkatsııalar qyzmetinde.

Bilim salasynda 2023 jyldan beri 27 jańa mektep iske qosyldy, onyń 22-si aýyldyq eldi mekenderde ornalasqan. Jyl sońyna deıin taǵy 3 mektep ashylady, 11 apatty jáne úsh aýysymdy bes mekteptiń máselesi sheshildi. Qazirgi tańda 11 mekteptiń qurylysy júrip jatyr.

– 2025-2027 jyldary oblysta 86 mektepke kúrdeli jóndeý jumystary júrgizilmek. Bıyl jergilikti bıýdjet jáne «Qazaqstan halqyna» qory esebinen 3,3 mlrd teńgege 119 pándik kabınet satyp alyndy, – dedi oblys ákimi.

Sport ınfraqurylymy boıynsha, 2023-2025 jyldary 12 sport nysany ashyldy, bıyl 9 nysannyń qurylysy jalǵasyp jatyr. Osylaısha, halyqty sport nysandarymen qamtý kórsetkishi 66%-dan 76%-ǵa ósti.

Mádenıet salasynda 11 mádenıet úıi men keshender paıdalanýǵa berildi, bıyl 7 nysan salynyp jatyr. «Qazaqstan halqyna» qorynyń qoldaýymen aýyldarda 25 kitaphana jańǵyrtylyp, Oralda kreatıvti hab ashyldy.

Buǵan deıin Narıman Tóreǵalıev «Qaladan aýylǵa» jobasy aıasynda myńǵa jýyq adam aýylǵa kóshkenin aıtqan edi.

Sonymen birge, BQO-da eki sý qoımasy salynady.