BQO: «Aýyl amanaty» baǵdarlamasy aıasynda 7,9 mlrd teńge nesıe berilmek
ORAL. KAZINFORM – Batys Qazaqstan oblysynda bıyl «Aýyl amanaty» baǵdarlamasy aıasynda respýblıkalyq bıýdjetten 7,919 mln teńge nesıe bólý qarastyrylyp otyr.
BQO aýyl sharýashylyǵy basqarmasynyń basshysy Aıan Halaýedınniń óńirlik kommýnıkatsııalar qyzmeti alańynda ótken brıfıngide málim etkenindeı, osy qarajat esebinen 922 shaǵyn nesıe berip, 2 244 jańa jumys ornyn ashý kózdelýde.
Basqarma basshysynyń sózine qaraǵanda, nesıe kooperatıvter men shaǵyn bıznesti damytý, ósimdik, qus, sútti mal sharýashylyǵy, aýyldar men shaǵyn qalalarda aýyl sharýashylyǵy ónimderin óndirý, óńdeý jáne qaıta óńdeý, halyqqa qyzmet kórsetiletin aýyl sharýashylyǵyna jatpaıtyn bıznes túrlerin, balyq jáne bal-ara sharýashylyǵyn óristetý, etti baǵyttaǵy iri qara men usaq maldy bordaqylaý baǵytynda berilmek.
«Memleket basshysy jeke qosalqy sharýashylyqty kooperatıvterge biriktirý arqyly aýyl turǵyndarynyń tabysyn arttyrý qajet dep tapsyrǵan bolatyn. Bul – «Aýyl amanaty» baǵdarlamasynyń birden-bir maqsaty. Kúni búgin oblys kóleminde 394 aýyl sharýashylyǵy óndiristik kooperatıvi tirkelse, sonyń 270-i naqty jumys istep tur. Bıyl osy aýyl sharýashylyǵy kooperatıvterin «Aýyl amanaty» baǵdarlamasy aıasynda shaǵyn nesıeleý arqyly qajetti tehnıka, qurylǵylarmen qamtyp, olar sol aýyldyq okrýgtiń mamandanýy baǵytynda qyzmetter atqaratyn bolady», - deıdi A.Halaýedın.
Onyń aıtýynsha, shaǵyn kásipkerlikpen aınalysýǵa nıettiler sany artyp keledi. Aýyl turǵyndary arasynda baǵdarlama aıasynda kásip ashý boıynsha nıettiler 2,3 mlrd teńgeni quraıtyn 187 ótinish berip otyr. Ótinishterdiń basym bóligi servıstik qyzmet kórsetýge (tehnıkalyq qyzmet kórsetý stantsııasy, shashtaraz, qoǵamdyq tamaqtaný oryndary, qurylys materıaldaryn óndirý) qatysty.
2024 jyly «Aýyl amanaty» baǵdarlamasy arqyly shaǵyn nesıeleý sol aýdan nemese aýyldyq okrýgke áleýmettik mańyzdy 19 azyq-túlik taýarlarynyń tizbesine oraı qajettikke qaraı baǵyttalatyn bolady. Mysaly, ár aýyl óz-ózin áleýmettik mańyzdy azyq-túlik taýarlarymen qamtýy tıisti degen qaǵıdatty ustanýy jáne osy baǵdarlama arqyly barynsha jumystanýy qajet. Bul jerde aýyl sharýashylyǵy kooperatsııasy mańyzdy ról atqarady, ıaǵnı, aýyldar, aýdandar geografııalyq ornalasýyna qaraı aýyl sharýashylyǵy taýarlaryn óndirýde barynsha birigip jumys tyndyrýy kerek.
«Aýyl amanaty» baǵdarlamasyn tıisti deńgeıde uıymdastyrý maqsatynda oblystyq, 12 aýdandyq jáne 147 aýyldyq okrýgte jobalyq keńseler jáne jumys toptary quryldy. 2024 jyly baǵdarlamany nátıjeli iske asyrý maqsatynda óńirdiń barlyq 147 aýyldyq okrýginiń 413 aýyldyq eldi mekenine skrınıng júrgizildi. Nesıe alýǵa bildirilgen ótinishter óńirdiń barlyq eldi mekenderin qamtyp otyr», - dedi A.Halaýedın.
Aıta keteıik, ótken jyly 6,4 mlrd teńge nesıe qarajatyna 1 065 ótinim maquldanyp, 6,3 mlrd teńge kóleminde 966 shaǵyn nesıe berildi. Sonyń ishinde 49 aýyl sharýashylyǵy óndiristik kooperatıvi (nesıe kólemi – 987,6 mln.teńge, músheler sany – 469 adam) qarjylandyryldy.
