BQO aýdanynda eki ınvestıtsııalyq jobany júzege asyrý kózdelýde
ORAL. QazAqparat - Terekti aýdanynda qos birdeı ınvestıtsııalyq jobany júzege asyrý esebinen óndiris kólemin ósirý kózdelýde.
Aýdan ákimi Murat Muqaevtyń Ortalyq kommýnıkatsııalyq qyzmeti óńirlik fılıalynda búgin málim etkenindeı, onyń biri munaı ónimderin qaıta óńdeý zaýyty qurylysy («ABS-munaı» JShS) bolsa, ekinshisi - «ÝralTek-NefteHım» JShS negizinde munaı ónimderin saqtaý bazasyn qalpyna keltirý, lak-boıaý ónimderin óndirý. Osy jobalar oıdaǵydaı iske assa, 200-den astam jumys orny ashylyp, munaı ónimderin shyǵarý kólemi jylyna 0,8 - 1 mln tonnaǵa jetedi delinýde.
Bıylǵy segiz aıdaǵy ónerkásiptegi óndiris kólemi 2629,7 mln teńgege jetti. Bul - oblys aýdandary men Oral qalasy boıynsha tórtinshi orynda degen sóz. Ónerkásip óndirisi kóleminiń ósimi munaı ónimderin óndirýdi ulǵaıtý esebinen qamtamasyz etildi.
Ónerkásip óniminiń negizgi kólemi óńdeý salasyna tıesili. Óńdeýshi ónerkásiptiń qurylymynda munaı óńdeý óndirisi shamamen 81,1 paıyzdy, azyq-túlik ónerkásibiniń ónimderi 14,9 paıyzdy quraıdy. Ónerkásip salasyndaǵy negizgi kásiporyndar: «B.N GasOil Processing» JShS - aýyr dıstıllıanttyq suıyq otyn, gazoıldyq fraktsııa, qaıta aıdaý qaldyqtaryn, «Jaıyqgıdrogeologııa» JShS - alkogolsiz sýsyndardy, «Terekti maı kombınaty» JShS tazartylǵan jáne tazartylmaǵan kúnbaǵys maıyn shyǵarýmen aınalysady.
Jyl basynan beri negizgi qarjyǵa 1423,7 mln teńge qosyldy, bul - oblys aýdandary boıynsha úshinshi oryn.
Turǵyn úı qurylysyna salynǵan ınvestıtsııalardyń jalpy kólemi 752,7 mln tengege jetip, ótken jyldyń osy kezeńimen salystyrǵanda, 1,5 esege ósti. 12 079 sharshy metr turǵyn úı paıdalanýǵa berildi, bul 2015 jylǵydan 151 paıyzǵa artyq.
Aýyl sharýashylyǵyndaǵy ınvestıtsııa kólemi 149 paıyzǵa artyp otyr. Aýyl sharýashylyǵyna qolaıly alqaptardyń bolýy aýdanda malmen qatar ósimdik sharýashylyǵyn da damytýǵa mol múmkindik berip otyr. Aýyl sharýashylyǵy óniminiń kólemi 5574,5 mln teńge boldy.
«Elbasy Qazaqstan halqyna Joldaýynda álemdik geosaıası jaǵdaıdyń ýshyǵýy jaǵdaıynda keń kólemdi máselelerdi birinshi kezekte sheshýimiz kerek degen bolatyn. Sondyqtan Qazaqstannyń «Nurly jol» jańa ekonomıkalyq saıasatyna sáıkes endigi jobalar ekonomıkalyq ósýge, ishki qor men óndiristi, kólik pen energetıkany, ındýstrııa men áleýmettik ınfraqurylymdy, shaǵyn jáne orta bıznesti damytýǵa baǵyttalady.
Biz aýdanda Aqjaıyq, ıÝbıleınyı, Toqpaı, Jańaómir, Fedorov aýyldarynda ınjenerlik-kommýnıkatsııalyq ınfraqurylymdy damytý jobalaryn bastap kettik. Osy jobalar nátıjesinde jeke turǵyn úı qurylysyn salamyn deýshilerge 1 329 jer telimi beriledi.
Kólik-logıstıka ınfraqurylymyn damytý maqsatynda kólik-logıstıka ortalyǵyn («NefteStroıServıs LTD» JShS») salý josparymyzda bar. Indýstrııa aımaǵyn qurý aıasynda Aqsýat aýyldyq okrýgi aýmaǵynan 286 ga jer telimin bólip otyrmyz. Kúni búgin ırandyq ınvestorlardan 100 ga aýmaqqa jylyjaı keshenin salý týraly usynas tústi», dedi M.Muqaev QazAqparat tilshisine.
Aıta keteıik, Terekti aýdany 1933 jyly qurylǵan, ortalyǵy - Fedorov aýyly. 15 aýyldyq okrýgte 52 eldi meken bolsa, olarda 37922 adam turady.
Aýdan bıýdjeti 6 348,3 mln teńge bolsa, sonyń ishinde óz kirisi - 950,6 mln teńge. Kiristiń negizgi kózi (98,3 paıyzy) - salyqtyq túsimder. Aýdan bıýdjetiniń salyqtyq túsimder boıynsha jospary 164,1 paıyzǵa oryndalyp, 261,4 mln teńge boldy. Al joǵary turǵan bıýdjetten qaralǵan maqsatty transfertter men nesıeler kólemi - 2 523,6 mln teńge.
