BQO aýdandarynda dáriger mamandar jetispeıdi
BQO densaýlyq saqtaý basqarmasynyń basshysy Arman Qalıbekovtiń aıtýynsha, aýdandarda 25 hırýrg jumys isteıdi.
Al Terekti aýdandyq №2, Kaztalov aýdandyq №2 jáne Qaratóbe aýdandyq aýrýhanasynda hırýrgtar joq.
Sol sekildi Qaratóbe, Syrym, Jánibek, Shyńǵyrlaý, Tasqala aýdandarynda anestezıolog-reanımatologtar bolmaı otyr.
Basqarma basshysynyń sózine qaraǵanda, aýyl turǵyndaryna hırýrgııalyq kómek kórsetý úshin oblystyq klınıka mamandarynan quralǵan kóshpeli brıgadalar uıymdastyrylýda. Atap aıtqanda, hırýrg mamandar Qaratóbe, Jánibek, Jańaqala, Bókeı ordasy aýdandaryna shyqty.
«Qazirgi tańda Aqtóbe qalasyndaǵy M.Ospanov atyndaǵy Batys Qazaqstan medıtsına ýnıversıtetinde jáne Almatydaǵy S.Asfendııarov atyndaǵy Qazaq ulttyq medıtsına ýnıversıtetinde 14 rezıdent oqyp jatsa, sonyń tórteýi – hırýrg, beseýi – anestezıolog. Aýdandyq aýrýhanalardy kadrlarmen qamtý erekshe baqylaýda. Osy oraıda aýdan ákimderi tarapynan da turǵyn úı berý, birjolǵy tólemaqy tóleý sııaqty túrli qoldaý sharalary qabyldansa, durys bolar edi», dedi A.Qalybekov.
Oblysta densaýlyq saqtaý salasynda barlyǵy 1716 dáriger, 6576 orta býyn medıtsına qyzmetkeri jumys jasaıdy.
Kadr máselesin sheshý maqsatynda jergilikti bıýdjet esebinen medıtsına ýnıversıtetterinde 169 stýdent bilim alýda.
2021 jyly jergilikti qazynadan rezıdentýrada oqýǵa 15 mamanǵa jáne medıtsına ýnıversıtetterinde bilim alýǵa abıtýrıentterge 50 grant bólinse, bıyl túlekter úshin grant sany 60-qa jetkizilmekshi.
Bıylǵy sáýir aıynda oblystyq kópbeıindi aýrýhana bazasynda M.Ospanov atyndaǵy Batys Qazaqstan memlekettik ýnıversıtetiniń fılıaly ashylyp, onda rezıdentter 13 baǵyt boıynsha bilim alyp, mashyqtanýdan ótpekshi. Qazir onda 39 maman biliktiligin jetildirýde.
Respýblıkalyq bıýdjetten BQO-ǵa rezıdentýraǵa 26 mamandyq boıynsha 82 grant bólindi.
Eske sala keteıik, budan buryn hırýrg Erbol Eseevtiń hal ústinde jatqan naýqasty qutqarýdan artyq abyroı joq ekendigi týraly aıtqanyn jazǵan bolatynbyz.