BQO: Aqsaıda atys bolyp, er adam aýrýhanaǵa tústi
ORAL. QazAqparat - Aqsaı qalasynda atys bolyp, er adam aýrýhanaǵa tústi, dep habarlaıdy QazAqparat tilshisi.
Oqıǵa 16 qyrkúıek kúni túnde «Renko» qonaqúıiniń aýlasynda oryn aldy.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, jedel járdemge qońyraý saǵat 01.20-da shalynǵan. Jedel járdem brıgadasy oqıǵa ornyna alty mınýttan keıin jetken.
«Aldyn ala málimetke qaraǵanda, kóptegen oq jaraqatyn alǵan 1977 jylǵy er adam 01.30-da Bórli aýdandyq ortalyq aýrýhanasyna jetkizildi. Basqa da jaraqaty bar, 2-3-inshi dárejeli travmatıkalyq eseńgireý dıagnozy da qoıylǵan», dedi A.Saqposynova.
BQO ishki ister departamentiniń baspasóz qyzmeti bul oqıǵanyń mán-jaıy anyqtalyp jatqanyn málimdedi.
