BQO ákimdiginiń burynǵy qyzmetkeri qamaýǵa alyndy

ORAL. KAZINFORM – Oral qalasynyń mamandandyrylǵan ákimshilik sotynda BQO ákimi apparaty ishki aýdıt qyzmetiniń burynǵy jetekshisi Erbol Naızabekovke qatysty is qaraldy.

БҚО әкімдігінің бұрынғы қызметкері қамауға алынды
Фото: pixabay

Sot talqysynda málim bolǵanyndaı, 1 qazan kúni Volkswagen Tiguan avtokóliginiń júrgizýshisi baǵdarshamda toqtap turǵan Mercedes kóligin soqqan. Saldarynan Mercedes «VAZ» jáne Skoda Rapid avtokólikterin túıgen.

Volkswagen Tiguan avtokóliginiń rýlinde bolǵan Erbol Naızabekov medıtsınalyq kýálandyrý nátıjesi boıynsha orta dárejeli mas kúıinde bolǵan. 

Sýdıa Ásel Ǵaınedınovanyń aıtýynsha, sot isti qaraý merzimi ótpegen dep esepteıdi. 

- Óıtkeni sońǵy saraptama nátıjeleri bıylǵy 24 qańtarda alynǵan. Sondaı-aq sarapshy Erbol Naızabekovtyń mas kúıinde bolǵandyǵyn kórsetken. Onyń kinási dáleldendi, - dedi Ásel Ǵaınedınova.

Erbol Naızabekov Ákimshilik quqyqbuzýshylyq kodeksi 608-baby 3-bóligine sáıkes aıypty dep tanylyp, ol 20 kúnge ákimshilik qamaqqa alyndy. Sonymen qatar 7 jylǵa kólik basqarý quqyǵynan aıyryldy. 

Ásel Ǵaınedınova jábirlenýshi Aqbota Keńestiń bastapqyda hattamada kórsetilmegenimen, isti zertteý barysynda onyń Mercedes avtokóliginde otyrǵany anyqtalǵanyn jetkizdi. 

- Saraptamaǵa sáıkes jábirlenýshiniń densaýlyǵyna jeńil dárejede zııan keltirilgen. Eger emdelý barysynda taǵy da saraptamadan ótip, orta dárejede zııan keltirilgen dep tanylsa, onda jańadan ashylǵan mán-jaı boıynsha qylmystyq is qozǵalýy múmkin, - dedi sýdıa. 

Sot qaýlysy kúshine engen joq. 

- Endi azamattyq talap aryz bergimiz keledi. Qol qysqa bolǵanymen, advokat jaldaıtyn shyǵarmyz. Qyzym eki kúnniń birinde aýyryp qalady. Onyń aıaǵynan tik turmaıynsha toqtamaımyn. Shaýyp júrgen qyzym osyndaı halge túsip qaldy, - dedi Kazinform tilshisine Aqbotanyń anasy, Atyraý oblysy Inder aýdanynda turatyn Gúljan Jarqynbaeva.

Eske sala keteıik, budan buryn jol-kólik oqıǵasyn jasaǵan BQO ákimdiginiń qyzmetkeri jumysynan bosatylǵanyn jazǵan edik.

Сейчас читают