BQO ákimdiginiń bos bilim berý grantyna konkýrs ótkizbegeni anyqtaldy
ORAL. KAZINFORM – BQO mamandandyrylǵan aýdanaralyq ákimshilik sotynda stýdenttiń Batys Qazaqstan oblysynyń ákiminen bilim berý grantyn alý quqyǵyn qorǵaý týraly isin qarady.
BQO sotynyń baspasóz qyzmetinen málim etkenindeı, buǵan deıin B. joǵary oqý oryndarynyń qabyldaý komıssııalary tarapynan zańsyz bas tartý saldarynan bilim berý grantyn taǵaıyndaý konkýrsyna qatysý múmkindiginen aıyrylǵan. Bul mán-jaı zańdy kúshine engen sot sheshimimen rastalǵan.
Іsti qaraý sátinde B. medıtsınalyq ýnıversıtette aqyly negizde bilim alýda. Sot talqylaýy barysynda 2025–2026 oqý jylynda jergilikti bıýdjet qarajaty esebinen medıtsına mamandyǵy boıynsha birqatar bilim berý granttary bólingeni, olardyń bireýi keıinnen bos qalǵany anyqtaldy.
Sot ýákiletti organnyń atalǵan bos grantty bólý boıynsha zańnamada belgilengen merzimde konkýrs ótkizbegenin, sonyń saldarynan tegin bilim alýǵa úmitkerlerdiń quqyqtary buzylǵanyn belgiledi.
Іsti qaraý qorytyndysy boıynsha sot Batys Qazaqstan oblysy ákimdigine 2026 jyldyń jazǵy kanıkýl kezeńinde medıtsına baǵdarlamasy boıynsha bos bilim berý grantyn bólýge konkýrs ótkizýdi mindettep, talapkerdiń osy konkýrsqa jalpy negizde qatysý quqyǵyn tanýdy qaýly etti. Sonymen qatar sot grantty konkýrstyq rásimnen tys tikeleı berý týraly talapty qanaǵattandyrýdan bas tartty. Óıtkeni qoldanystaǵy zańnama olardy tek konkýrstyq tártippen taǵaıyndaýdy kózdeıdi.
- Sondaı-aq sot tek birinshi kýrs úlgerim kórsetkishteri negizinde konkýrsqa qatysýdyń jeke tártibin belgileý týraly talapty da qanaǵattandyrýdan bas tartyp, sottyń ákimshilik rásimderge aralasýyna jol berilmeıtinin atap ótti. Sot sheshimi joǵary bilimge teń qol jetkizý qaǵıdattaryn qamtamasyz etýge jáne bilim berý granttaryn bólýdiń zańda belgilengen tártibin saqtaýǵa baǵyttalǵan. Sot sheshimi zańdy kúshine engen joq, - dep habarlady vedomstvodan.
Eske sala keteıik, budan buryn BQO-da aǵasynyń malyn joıyp jibergen lýdoman baqtashynyń sottalǵanyn jazǵan bolatynbyz.
