BQO ákimi Tszıansý provıntsııasynyń Halyq úkimetiniń tóraǵasymen kezdesti
ORAL. KAZINFORM - Batys Qazaqstan oblysy delegatsııasynyń jetekshisi, oblys ákimi Narıman Tóreǵalıev Qytaı Halyq Respýblıkasyna resmı sapary aıasynda Tszıansý provıntsııasy Halyq úkimetiniń tóraǵasy, partııa komıteti hatshysynyń orynbasary Sıýı Kýnlınmen kezdesti.
Narıman Tóreǵalıev óz sózinde Qazaqstan Respýblıkasynyń Prezıdenti Qasym-Jomart Kemeluly Toqaev 2025 jylǵy 16 maýsymda Astana qalasynda ótken 2-shi «Qytaı – Ortalyq Azııa» sammıtinde Qytaı Halyq Respýblıkasynyń Tóraǵasy Sı Tszınpınmen kezdesýi barysynda QHR Qazaqstannyń iri saýda-ekonomıkalyq seriktesi dep aıtqanyn jáne elder arasyndaǵy qarym-qatynas árqashan dostyq pen yntymaqtastyqqa qurylǵanyn atap ótti.
«Qazaqstan úshin Qytaı mańyzdy qyzmet salalaryndaǵy strategııalyq seriktes. Bizdi qos memlekettiń táýelsiz damý jolyn saqtaı otyryp, tatý kórshilik pen ózara syılastyq qaǵıdattary negizinde ǵasyrlar boıy qalyptasqan tarıhı dostyq baılanystyrady. Bul týraly eki el kóshbasshylary joǵary deńgeıdegi kezdesýlerde birneshe ret aıtyp ótken bolatyn. Batys Qazaqstan oblysy – Qazaqstannyń "batys qaqpasy". Qytaımen aradaǵy tyǵyz saýda-ekonomıkalyq baılanystardy eskere otyryp, biz ekijaqty yntymaqtastyqty keńeıtý úshin, ózara tıimdi jobalardy júzege asyrýǵa daıynbyz», – dedi N. Tóreǵalıev.
Tszıansý provıntsııasynyń Halyq úkimetiniń tóraǵasy da óńirmen saýda-ekonomıkalyq baılanysty nyǵaıtýǵa múddeli ekenin bildirdi. Sıýı Kýnlın provıntsııanyń Qazaqstanmen tabysty yntymaqtastyq ornatylǵanyn jáne júzege asyrylǵan birqatar jobalar osynyń dáleli ekenin atap ótti.
Kelissózder barysynda taraptar Batys Qazaqstan oblysy men Qytaıdyń eń damyǵan ındýstrııalyq óńirleriniń biri – Tszıansý provıntsııasy arasyndaǵy saýda-ekonomıkalyq áriptestikti tereńdetý máselelerin talqylady.
BQO ákimi óńirdiń Qytaıdyń ındýstrıaldy-logıstıkalyq ortalyqtarymen tikeleı baılanys ornatýǵa strategııalyq múddeli ekenin atap ótti. Sondaı-aq ol saýda aınalymynyń joǵary qarqynyna toqtaldy: 2024 jyly BQO men Qytaı arasyndaǵy taýar aınalymy 25 paıyzǵa artyp, 88,4 mıllıon AQSh dollaryn qurady.
Kezdesý barysynda mynadaı salalardaǵy jobalardy iske asyrý máselelerine erekshe nazar aýdaryldy:
aýyl sharýashylyǵy jáne avtokólik tehnıkasyn óndirý,
qatty turmystyq qaldyqtardy jáne aýyl sharýashylyq ónimderin óńdeý,
tazartý qurylystaryn salý jáne jańǵyrtý;
Qytaı – Ortalyq Azııa – Eýropa baǵyty boıynsha logıstıkalyq marshrýttardy damytý.
Taraptar ekijaqty baılanysty jandandyrýǵa, sondaı-aq Qytaı ınvestorlarynyń Batys Qazaqstandaǵy agroónerkásip jáne ónerkásip klasterlerine qatysýyn arttyrýǵa kelisti.
Kezdesý sońynda oblys ákimi Tszıansý provıntsııasynyń basshylyǵyna jyly qabyldaýy úshin alǵysyn bildirip, qol jetkizilgen kelisimder eki jaqty ózara tıimdi yntymaqtastyqtyń berik negizine aınalatynyna senim bildirdi.
Bul kezdesý Qazaqstan Respýblıkasynyń Qytaı Halyq Respýblıkasyndaǵy Elshiliginiń qoldaýymen uıymdastyryldy.