BQO ákimi orynbasarynyń sottalýyna baılanysty otstavkaǵa ótinish bere me – ákimdik jaýap berdi
BQO ákimi burynǵy birinshi orynbasarynyń sottalýyna baılanysty otstavkaǵa ótinish bere me? Osyǵan oraı ákimdik jaýap berdi, dep habarlaıdy QazAqparat tilshisi.
BQO ákiminiń baspasóz qyzmetinen málim etkendeı, Erjan Baltaev oblys ákiminiń birinshi orynbasary laýazymyn atqarǵan kezde 2023 jyldyń aqpanynda basqa adamdar úshin paıda men artyqshylyqtar alý maqsatynda qylmys jasaýǵa baǵyttalǵan zańsyz tapsyrma bergen.
«Bul derek anyqtalǵan kezde Erjan Baltaev túsinikteme jazdy jáne ony teris sebepter boıynsha jumystan shyǵarý jóninde sheshim qabyldandy. Sot sheshimi jarııalanǵannan keıin Batys Qazaqstan oblysynyń ákimimen otstavkaǵa shyǵý týraly másele zań aıasynda qarastyryldy. Alaıda «Qazaqstan Respýblıkasynyń memlekettik qyzmet týraly» Zańynyń 60-babyna sáıkes memlekettik saıası qyzmetshi laýazymǵa taǵaıyndalǵan kúnnen bastap úsh aı ótken soń qaramaǵyndaǵylar sybaılas jemqorlyq qylmys jasasa, otstavkaǵa ótinish beretini atap kórsetilgen. Oral qalalyq sotynyń zańdy kúshine engen úkimine sáıkes E.Baltaev óziniń qylmystyq pıǵylyn 2023 jyldyń aqpanynda iske asyra bastaǵan. Batys Qazaqstan oblysynyń ákimi Narıman Tóreǵalıev óz qyzmetine 2022 jyldyń 2 jeltoqsanynda taǵaıyndaldy. 2023 jyldyń aqpanynda E.Baltaev zańsyz tapsyrma bergende, N.Tóreǵalıev ákim laýazymynda úsh aıdan az ýaqyt jumys atqarǵan. Sondyqtan «Qazaqstan Respýblıkasynyń memlekettik qyzmeti týraly» Zańynyń tıisti normasy bul naqty jaǵdaıda qoldanylmaıdy», - dep habarlady vedomstvodan.
Eske sala keteıik, budan buryn BQO ákiminiń birinshi orynbasary Erjan Baltaevtyń qyzmetinen ketkenin jazǵan bolatynbyz.
Sondaı-aq jemqorlyǵy úshin sottalǵan BQO ákimi orynbasarynyń apellıatsııa shaǵymyn sot qaramady.
