BQO ákimi óńirdegi tuz tapshylyǵy týraly pikir bildirdi

ASTANA. KAZINFORM – Batys Qazaqstan oblysynyń ákimi Narıman Tóreǵalıev óńirdegi tuz tapshylyǵy týraly tilshiler suraǵyna jaýap berdi. 

– Tuz tapshylyǵy rasymen boldy, bul «Rýssol» reseılik óndiristik kompanııasyndaǵy máselelerge baılanysty. Shamamen 10 kúnge jýyq olardyń jumysy toqtap turdy. Sonyń saldarynan dúrbeleń bolyp, tuz jetispedi, – dedi N.Tóreǵalıev elordada Ortalyq kommýnıkatsııalar qyzmetinde.

Oblys ákimi qazir másele tolyq sheshilgenin aıtty. Onyń sózinshe, Atyraý oblysynan («Indertuz»), Qyzylorda oblysynan («Araltuz») jáne «Rýssol» kompanııasynan tuz jetkizilip jatyr. 

– Qazirgi ýaqytta dúken sórelerinde tuzdyń jetkilikti kólemi bar, sondyqtan eshqandaı problema joq. Baǵasy da qolaıly – eń arzany 52 teńge, eń qymbaty – 69 teńge, – dep tolyqtyrdy Narıman Tóreǵalıev.

Buǵan deıin Narıman Tóreǵalıev «Qaladan aýylǵa» jobasy aıasynda myńǵa jýyq adam aýylǵa kóshkenin aıtqan edi. 

Aıta keteıik, Batys Qazaqstan oblysynda avtojoldar men temirjol vokzaldary jóndeýden ótip jatyr.