BQO ákimi óńirdegi sý basqan jerlerdegi jumyspen tanysty
ASTANA. KAZINFORM - Batys Qazaqstan oblysynyń ákimi Narıman Tóreǵalıev Oral qalasyndaǵy Zashaǵan kentindegi sý basý qaýpi bar shaǵyn aýdandarǵa, Saratov tas jolyndaǵy sý arnasy júıesine, sondaı-aq, Oral qalasynyń eski ortalyq kóshelerinde boldy.
Oblys ákimi tótenshe jaǵdaılar departamentine, qala ákimdigine jáne kommýnaldyq qyzmet salasynyń mamandaryna – qar, jańbyr sýlaryn ýaqytyly shyǵarý, joldardy bógeý, qapshyqtarmen qum tóseý, sý arnalary men qubyrlardy tazalaýdy tapsyrdy.
Aıta keteıik, búgin 2024 jylǵy 26 naýryz kúni oblys aýmaǵynda jáne Oral qalasynda jaýyn-shashyn toqtaýsyz jaýyp tur. Osyǵan baılanysty, jańbyr jáne erigen qar sýy jerdiń jibimeýine, ıaǵnı tońnyń qalyń bolýyna baılanysty, jerge sińbeı turǵyn úılerdi sý basý qaýpi týyp tur.
Qazirgi ýaqytta sý tasqynynyń aldyn alý boıynsha arnaıy oblystyq shtab táýlik boıy jumys isteıdi. Óńir basshysy Narıman Tóreǵalıev shahardaǵy sý basqan qaýipti aýmaqtardy óz kózimen kórip, tıisti jumystardy kúsheıtilgen rejımde atqarýdy tapsyrdy. Óz sózinde oblys ákimi atalǵan jumystardy qatań baqylaýda ustaıtynyn jetkizdi.
