BQO ákimi óńirdegi belsendi jastardyń ata-analaryn otbasy kúnimen quttyqtady
ORAL. KAZINFORM — 15 mamyr - halyqaralyq otbasy kúnine oraı oblys ákimi Narıman Tóreǵalıev halyqaralyq, respýblıkalyq deńgeıdegi pándik olımpıada jáne sporttyq jarys jeńimpazdarymen jáne olardyń ata-analarymen kezdesti.
Óńir basshysy bilimdi, ónerli, salıqaly urpaq tárbıelep, qoǵamǵa óz úlesin qosyp otyrǵan otbasylarǵa alǵysyn bildirip, jınalǵandardy otbasy kúnimen quttyqtady.
«Memleket basshysy otbasy ınstıtýtyn nyǵaıtý qoǵam damýynyń negizi ekenin atap ótken bolatyn. Óńirlerde otbasy ınstıtýtyn qoldaý baǵytynda tıisti jumystar atqarylyp jatyr. Búgin daryndy, bilimdi, rýhy bıik urpaq tárbıelep otyrǵan otbasylardyń birqatarymen kezdesip otyrmyz. Barshańyzdy otbasy kúnimen quttyqtaımyn. Ósirip otyrǵan ul-qyzdaryńyz úmitterińizdi aqtap, táýelsiz elimizdiń órkendeýine adal qyzmet atqaratynyna, Aqjaıyqtyń abyroıyn asqaqtatynyna senimdimin», - dedi Narıman Tóreǵalıev.
Іs-shara barysynda otbasy músheleri de ózderiniń jyly lebizderin bildirip, ata-analar oblys ákimdigine, balalaryn jetistikke jetelegen ustazdaryna, qoldaý bildirgen jandarǵa alǵystaryn jetkizdi.
Jalpy, qazirgi tańda Batys Qazaqstan oblysy boıynsha 13 586 kópbalaly ana bar, onyń arasynda «Altyn alqa», «Kúmis alqa», «Batyr ana» ıegerleri — 6 558 adam. Oblysta 5 «Otbasy ortalyqtary» jumys isteıdi. Bıyl taǵy 3 aýdanda ashý josparlanyp otyr.
