BQO ákimi óńir turǵyndaryn Kórisý kúnimen quttyqtady
ORAL. KAZINFORM – Qazaq halqynyń ejelgi salt-dástúri boıynsha elimizdiń Batys óńirlerinde Naýryz meıramyn atap ótý – 14 naýryz Kórisý kúni merekesimen bastalady. Osy oraıda Batys Qazaqstan oblysynyń ákimi Narıman Tóreǵalıev Kórisý kúnin óńirdegi birqatar otbasyny quttyqtaýmen bastady.
Eń aldymen BQO ákimi Narıman Tóreǵalıev jáne óńirge is-saparmen kelgen QR Eńbek jáne halyqty áleýmettik qorǵaý mınıstri Svetlana Jaqypovamen birge tyl jáne eńbek ardageri, «Altyn alqa» ıegeri Jámıla Kenjeǵalıevanyń shańyraǵyna baryp, meırammen quttyqtady. Kópbalaly ana Jámıla Kenjeǵalıeva 99 jasqa kelgen. 8 bala tárbıelep, qazirgi ýaqytta 28 nemere, 70 shóbere, 8 nemene súıip otyr.
«Úlkenge – qurmet, kishige – izet» deıdi dana halqymyz. Kórisý kúni Sizge arnaıy kelip otyrmyz. Denińizge saýlyq, otbasyńyzǵa bereke, bala-shaǵańyzǵa amandyq tileımin», - dedi óńir basshysy.
Oblys ákimi budan soń, Kórisý kúnimen Aqjaıyq óńiriniń ónegeli otbasylarynyń biri – Bıǵalıevter áýletin quttyqtady. Olar Batys Qazaqstan óńirine 38 jyl buryn qurylǵan «Bıǵalıevter» otbasylyq ansamblimen tanymal. Qazirgi ýaqytta áke jolyn balalary jalǵap, óńirdiń mádenıet salasynyń damýyna óz úlesterin qosyp keledi.
Budan soń, Narıman Tóreǵalıev Oral qalasynda Naýryz merekesine oraı ótip jatqan is-sharalarǵa qatysyp, oblys turǵyndaryn Naýryz merekesiniń bastalýymen quttyqtady.
«Memleket basshysynyń bastamasymen bıyl elimizde Naýryz merekesi jańa formatta toılanady. Elimizdiń ár óńirinde 14-23 naýryz aralyǵynda dástúrimizdiń qundylyqtaryn dáripteýge baǵyttalǵan Naýryznama onkúndigi ótedi. Onyń aıasynda tanymdyq negizdegi túrli is-sharalar uıymdastyrylady. Barshańyzdy shýaqty kóktemniń alǵashqy kúnderimen kelip jetken – Kórisý merekesimen shyn júrekten quttyqtaımyn!», - dedi óńir basshysy.
Batys Qazaqstan oblysynda Kórisý kúni meıramy keń kólemde atalyp ótildi.
