BQO ákimi: oblystyń barlyq aýdanynda memlekettik arhıv ǵımarattary salynady
Memlekettik arhıvke 100 jyl tolýyna oraı Oralda halyqaralyq ǵylymı-tájirıbelik konferentsııa ótti, dep habarlaıdy Kazinform.
Oǵan elimizdiń ár óńirindegi mamandarmen qatar Túrkııa, Ázerbaıjan, Ózbekstan jáne Reseı elderinen delegattar kelip, ólketaný ǵylymy men muraǵattarǵa qatysty jańa derekterdi jarııalady.
Konferentsııanyń negizgi maqsaty – arhıv isiniń jáne sol mamandyqtyń mańyzy men bedelin arttyrý, salaǵa kóńil bólý, sondaı-aq mekemelermen ózara tájirıbe almasý boldy.
Konferentsııanyń saltanatty ashylý rásimine qatysqan oblys ákimi Narıman Tóreǵalıev sala mamandaryn tarıhı datamen jáne arhıvshiler kúnimen quttyqtap, úzdik kadrlardy marapattady.
«Memleket basshysy Qasym-Jomart Kemeluly Astanada ótken Túrki memleketteri uıymynyń H sammıtinde bylaı degen edi: «Tarıhtan syr shertetin ortaq muraǵatty zerttep, urpaqqa aqıqatty jetkizý – bizdiń paryzymyz. Quzyrly organdarymyzǵa beımálim derekterdi birlesip zerdeleýdi tapsyrýdy usynamyz. Bul, shyn máninde mańyzdy jumys bolmaq, sebebi ortaq tarıhymyzda áli de tolyq zerttelmegen aqtańdaqtar bar». Búginde Batys Qazaqstan oblysy memlekettik arhıvinde 2453 qor jáne 643 704 saqtaý birligi bar. «Tsıfrlyq Qazaqstan» baǵdarlamasy aıasynda oblystyń memlekettik arhıviniń bazasynda «Elektrondyq arhıv» avtomattandyrylǵan aqparattyq júıesin engizýge bıýdjetten 110 mln teńge bólindi. Syıymdylyǵy 200 myń saqtaý birligine arnalǵan arhıv ǵımaratynyń jobalyq-smetalyq qujattamasy jasaqtalyp, Aqjaıyq, Báıterek, Bókeı Ordasy, Jánibek jáne Syrym aýdandaryna 2024 jyly áleýmettik-ınvestıtsııalyq joba aıasynda salý josparlanýda. Al 2025-2026 jyldary barlyq aýdanda arhıv ǵımarattary salynady» dedi oblys ákimi Narıman Tóreǵalıev.
Arhıv salasy qyzmetkerleriniń jalaqysy sońǵy úsh jylda 50 paıyzǵa deıin kóterildi. Al 2025 jyly 100 paıyzǵa jetedi. Batys Qazaqstan akademııalyq kolledjinde arnaýly bilimdi mamandar daıyndalyp jatyr. Jyl saıyn 25 maman memlekettik grant esebinen bilim alyp, vedomstvolyq jáne basqa da arhıvterde eńbek etedi.
Plenarlyq májilis barysynda otandyq jáne shetel mamandary ólke tarıhyna qatysty jańa derekterdi tizbektedi. Mysaly, Vıkara ýnıversıteti tilder jáne tarıh geografııa fakýltetiniń bólim basshysy Gýndogdý Abdýllah «Batys jáne Túrkııadaǵy zertteýlerden Qazaqstandaǵy asharshylyqqa sholý» taqyrybyn qaýzady. Zobalań jyldary qazaq dalasynda asharshylyq saldarynan jurttyń toz-tozy shyqty. Túrkııalyq ǵalym dál sol kezeń týraly Eýropa elderniń muraǵatynan jınaǵan birqatar maǵlumatty jetkizip, derekter qoryn baıyta tústi. Al ortalyq memlekettik kıno-fotoqujattar men dybys jazbalar arhıvi dırektorynyń orynbasary, tarıh ǵylymdarynyń kandıdaty Sáýle Sataeva «Arhıvti damytýdyń perspektıvalyq baǵyttary jáne halyqaralyq qyzmeti» jóninde oı órbitip, salany damytýdyń ozyq ádis-tásilderin tilge tıek etti.
