BQO ákimi men Orynbor oblysy vıtse-gýbernatory yntymaqtastyqty damytý máselelerin talqylady
ASTANA. KAZINFORM – Batys Qazaqstan oblysynyń ákimi Narıman Tóreǵalıev jumys saparymen Reseı Federatsııasynyń Orynbor oblysyna bardy, dep habarlaıdy ákimdiktiń baspasóz qyzmeti.
Sapar aıasynda ol Orynbor oblysynyń vıtse-gýbernatory - Úkimet tóraǵasynyń ekonomıkalyq jáne ınvestıtsııalyq saıasat jónindegi orynbasary Ignat Petýhovpen kezdesti. Kezdesýde taraptar saýda-ekonomıkalyq yntymaqtastyq pen bıznesti damytýdyń negizgi máselelerin talqylady.
Kezdesý barysynda Narıman Tóreǵalıev Batys Qazaqstan oblysynyń ınvestıtsııalyq áleýeti týraly aıtyp, kásiporyndardyń qolaıly jumys isteýi úshin zańnamalyq deńgeıde birqatar preferentsııalar men jeńildikter qarastyrylǵanyn atap ótti.
Sonymen qatar, BQO ákimi eki óńir arasyndaǵy turaqty áriptestiktiń mańyzdylyǵyna toqtalyp, ekonomıkalyq baılanystardyń oń dınamıkasyn erekshe atap ótti.
«Bizdiń Prezıdentimiz Qasym-Jomart Toqaev Qazaqstan men Reseı arasyndaǵy qarym-qatynastar berik ári myzǵymas dostyqtyń úlgisi ekenin únemi atap ótedi. 2024 jyldyń qańtar-qarasha aılarynda Batys Qazaqstan oblysynyń Reseı Federatsııasymen syrtqy saýda aınalymy 681,6 mıllıon dollardy qurady», – dedi Narıman Tóreǵalıev.
Bul ózara yntymaqtastyqta Orynbor oblysy erekshe ról atqarady, atalǵan kezeń aralyǵynda eki óńir arasyndaǵy taýar aınalymy 12,1 mıllıon dollarǵa jetti. BQO-dan Orynbor oblysyna gaz, qara metall synyqtary men qaldyqtary, arpa eksporttalsa, kerisinshe, Orynbordan dándi jáne sút ónimderi, beton men metall buıymdary jáne basqa da jergilikti naryqta suranysqa ıe taýarlar jetkiziledi.
«Osy múmkindikti paıdalana otyryp, bıznes ókilderin belsendi yntymaqtastyqqa shaqyramyn. Bizde birlesken jobalardy damytý úshin qolaıly jaǵdaı jasalǵan, ári qajetti qoldaý kórsetýge daıynbyz», – dep atap ótti óńir basshysy.
Saýda-ekonomıkalyq máselelerden bólek, kezdesýde densaýlyq saqtaý, bilim, ǵylym, mádenıet, aýyl sharýashylyǵy jáne basqa da salalardaǵy yntymaqtastyq máseleleri talqylandy.
Orynbor oblysy vıtse-gýbernatory Ignat Petýhov ózara múddeli salalarda yntymaqtastyq ornatýǵa qyzyǵýshylyq bildirdi.
Sonymen qatar, Batys Qazaqstan oblysynyń ákimi Orynbor oblysynyń ókilderin Qazaqstan men Reseı arasyndaǵy XXI Óńiraralyq yntymaqtastyq forýmyna qatysýǵa shaqyrdy. Forým jańa birlesken bastamalardy talqylaýǵa jáne áriptestik baılanystardy nyǵaıtýǵa arnalǵan alań bolmaq.
Kezdesý sońynda taraptar yntymaqtastyq týraly memorandýmǵa qol qoıý týraly ýaǵdalasty.
Aıta keteıik, Qazaqstandyq mamandar Reseıdiń ozyq qubyr tehnologııalarymen tanysty.