BQO ákimi maıdangerlerge Memleket basshysynyń merekelik quttyqtaýyn jetkizdi
ORAL. KAZINFORM – Jeńis kúnine oraı Batys Qazaqstan oblysynyń ákimi Narıman Tóreǵalıev maıdangerlerdiń shańyraǵynda bolyp, Memleket basshysy Qasym-Jomart Toqaevtyń merekelik quttyqtaýyn jetkizdi.
Soǵys jáne eńbek ardageri Venıamın Skalenko Bórli aýdanynda dúnıege kelgen. 17 jasynda ásker qataryna alynyp, maıdanǵa attandy. 98-gvardııalyq áýe-desanttyq Svır dıvızııasy quramynda boldy. Býdapesht, Vena jáne Bratıslava qalalaryn azat etýge qatysqan. Zaıyby Ksenııa Fedoseevna – tyl ardageri.
Soǵys jáne eńbek ardageri, Halyq qaharmany Ivan Gapıch 1923 jyly Aqmola oblysynda dúnıege kelip, Almatyda bilim alǵan. Ol maıdan dalasynda Polshany, Chehoslovakııany, Ýkraınany azat etýge qatysty. Máskeýde ótken áıgili Jeńis sherýinde boldy. Soǵystan keıingi jyldary prokýratýra organdarynda eseli eńbek etti. Sala ardagerine QR Bas prokýrory Berik Asylovtyń quttyqtaý haty tabystaldy.
Oblys ákimi maıdangerlerdi merekemen quttyqtap, amandyǵyn tiledi. Narıman Tóreǵalıev erlikpen, eńbekpen órilgen ómir joly qaısar rýh pen otansúıgishtiktiń ozyq úlgisi ekenin aıtty.
Otan úshin ot keshkenderdiń qurmetine orkestr Jeńis ánderin shyrqady. Soǵys jáne eńbek ardagerleri quttyqtaı kelgenderge aq batasyn berip, eldiń amandyǵyn, jerdiń tutastyǵyn tiledi.
