BQO ákiminiń turǵyndarmen kezdesýi onlaın túrde ótedi
ORAL. QazAqparat – Batys Qazaqstan oblysy ákiminiń turǵyndarmen kezdesýi onlaın túrde ótedi, dep habarlaıdy QazAqparat tilshisi.
BQO ákiminiń baspasóz qyzmeti málim etkenindeı, aýdandar men Oral qalasy basshylarynyń esepteri 3-16 aqpan aralyǵynda josparlanǵan. Oblys ákiminiń qorytyndy esep berý kezdesýi 20 aqpan kúni ótedi.
Turǵyndardyń qaýipsizdigin qamtamasyz etý maqsatynda oblys, qala jáne aýdan ákimderiniń eseptik kezdesýleri onlaın rejiminde ótkiziledi. Oblys pen qala ákiminiń eseptik kezdesýi tikeleı efır formatynda oblystyq telearna men ákimdiktiń áleýmettik jelilerdegi resmı paraqshalarynda uıymdastyrylady.
Turǵyndardyń esep berý kezdesýlerine onlaın túrde qatysý tártibi men tikeleı efırge siltemeler keıin habarlanady.
Halyqtyń usynystaryn, eskertýleri men pikirlerin jınaýdy qamtamasyz etý maqsatynda ákimdik ǵımarattarynda arnaıy jáshikter ornatyldy.
Eske sala ketsek, qazirgi kezde aýyldyq okrýg ákimderi sanıtarlyq talapty saqtaı otyryp, turǵyndarmen tikeleı kezdesip, esep berip jatyr.
