BQO ákiminiń «Egemen Qazaqstan» gazetiniń basshysymen kezdesýinde keleli máseleler qozǵaldy
ORAL. QazAqparat - Búgin Batys Qazaqstan oblysynyń ákimi Altaı Kólginov «Egemen Qazaqstan» respýblıkalyq gazeti» AQ basshysy, halyqaralyq Túrki akademııasynyń prezıdenti, tarıh ǵylymdarynyń doktory Darhan Qydyrálini qabyldady, dep habarlaıdy QazAqparat tilshisi.
Kezdesýde oblys basshysy QR Táýelsizdiginiń 25 jyldyǵy aıasynda atqarylyp jatqan sharalar, óńirdiń áleýmettik-ekonomıkalyq damýy týraly áńgimelep berdi.
«Egemen Qazaqstan» gazetiniń basshysy óz tarapynan respýblıkalyq basylymnyń aldaǵy ýaqytta da oblystaǵy asa mańyzdy oqıǵa-ózgeristerge, mereıtoılyq sharalarǵa qoldaý jasaıtynyn jetkizdi. Sonymen qatar ulttyń rýhanı saladaǵy máseleleri de qozǵaldy. Osy oraıda Darhan Qydyráli Túrki akademııasynyń prezıdenti retinde túrki halyqtarynyń ózara qarym-qatynasyn nyǵaıtý qajettigine nazar aýdardy. Mysaly, Batys Qazaqstan oblysynyń Tatarstan Respýblıkasymen baılanysy jaqsy. Óńirde turatyn tatar aǵaıyndarǵa únemi qoldaý kórsetilip keledi. Oralda Ǵabdolla Toqaı atyndaǵy músin men kóshege qosa mýzeıi jumys jasaıdy. Bıyl Oralda balalyq jáne jastyq shaǵy ótken tatardyń uly aqynynyń 130 jyldyǵy keń kólemde atalyp ótildi.
