BQO ákimi jazýshy, halyqaralyq syılyqtardyń ıegeri Rahymjan Otarbaevty qabyldady
ORAL. QazAqparat - Batys Qazaqstan oblysynyń ákimi Altaı Kólginov kórnekti jazýshy-dramatýrg, Qazaqstannyń eńbek sińirgen qaıratkeri, «Parasat» ordeniniń, halyqaralyq Aıtmatov jáne Mahambet syılyǵynyń ıegeri Rahymjan Otarbaevty 60 jasqa tolýyna oraı qabyldap, qurmet kórsetti, dep habarlaıdy QazAqparat.
Óńir basshysy Rahymjan Otarbaevtyń qazaq ádebıetine qosqan úlesi mol ekendigin, sonymen qatar tańdaýly týyndylary shet elder tilderine aýdarylyp, joǵary baǵalanyp otyrǵandyǵyn atap ótti. Aldaǵy ýaqytta da shyǵarmashylyq qyzmetinde tabystarǵa jetýine tilektestigin bildirip, ıyǵyna shapan japty.
Rahymjan Otarbaevtyń jastyq shaǵy Aq Jaıyq óńirimen tyǵyz baılanysty. Kórshiles Atyraý oblysy Qurmanǵazy aýdanynda dúnıege kelgen Rahymjan Oral pedagogıkalyq ınstıtýtynda bilim aldy. Aldymen aqyn retinde kóringen ol ınstıtýt bitirmeı-aq oblystyq «Oral óńiri» gazeti redaktsııasyna baýyr basyp, osynda eńbek jolyn bastady. Týǵan jerinde qazaq tili men ádebıeti pániniń muǵalimi bolǵan ol keıin Almatyǵa qonys aýdaryp, Qazaq teleradıokomıtetinde, «Qazaq ádebıeti» gazeti men «Jalyn» almanaǵynda qyzmet atqardy. Qyrǵyzstanda Qazaqstan elshiliginiń attashesi, Mańǵystaý oblystyq radıotelehabar kompanııasynyń tóraǵasy, Mahambet atyndaǵy Atyraý oblystyq qazaq drama teatrynyń dırektory, QR Prezıdenti Ákimshiliginiń sektor meńgerýshisi, Astanadaǵy Ulttyq akademııalyq kitaphananyń bas dırektory bolǵan qalamger qazirgi kezde Atyraý qalasynda turady.
24 qarasha kúni kezinde ózi bilim alǵan qara shańyraq - qazirgi M.Ótemisov atyndaǵy Batys Qazaqstan memlekettik ýnıversıtetinde qalamger shyǵarmashylyǵyna arnalǵan respýblıkalyq ǵylymı-tájirıbelik konferentsııa ótpekshi. Sondaı-aq oblystyq qazaq drama teatrynda «Jáńgir han» dramasy qoıylmaqshy.
Jýyrda Túrkııada jazýshynyń «Aq kóbelekter» áńgimeler jınaǵy men «Bas» romanynyń tanystyrylymy bolyp, ózi Qazaqstan elshiliginiń «Qazaqstan-Túrkııa» baýyrlastyq medalimen jáne «TÜRKSOY» taǵaıyndaǵan «Haldun Taner» halyqaralyq medalimen marapattaldy. Qazaq qalamgerin Máskeý ádebıetshiler qaýymy da joǵary baǵalap otyr. Buǵan deıin Reseı beıbitshilik qorynyń «Jemisti beıbitshilik shyǵarmashylyǵy úshin» altyn medalimen marapattalǵan Rahymjan Otarbaev stýdenttik shaǵy ótken Aq Jaıyq óńirine kele jatqan jolda Ivan Býnın atyndaǵy halyqaralyq ádebı syılyǵyn ıelengenin estipti.
Jazýshy-dramatýrgtyń aıtýynsha, Astana qalasyndaǵy Qalıbek Qýanyshbaev atyndaǵy akademııalyq qazaq mýzykalyq drama teatry el Táýelsizdiginiń 25 jyldyǵyna oraı onyń «Ámire» pesasyn qoımaqshy. Ózi «Altyn adamnyń oıanýy», «Aqyrzaman» atty romandaryn jazý ústinde.
Aıta keteıik, qalamgerdiń ár jyldary «Sher», «Juldyzdar qulaǵan jer», «Jaıyq jyry», «Qarasha qazdar qaıtqanda», «Daýysyńdy estidim», «Otverjennyı mır» sekildi prozalyq jınaqtary men tańdamaly shyǵarmalarynyń qos tomdyǵy jaryq kórgen. Týyndylary orys, túrik, arab, qytaı, aǵylshyn tilderine aýdarylyp, kitap bolyp basylǵan. Sondaı-aq «Beıbarys sultan», «Bas», «Nashaqor jaıly novella», «Nurjaýǵan-ǵumyr», «Syrym batyr», «Mustafa Shoqaı» syndy pesalary respýblıkalyq jáne shetel teatrlarynda sahnalanǵan.
