BQO ákimi «Rýhanı jańǵyrýǵa» baılanysty oqýshylarmen oı bólisti
ORAL. QazAqparat - Batys Qazaqstan oblysynyń ákimi Altaı Kólginov jańa oqý jylynyń bastalýyna oraı birneshe mektepte bolyp, «Rýhanı jańǵyrý» baǵdarlamasynyń mán-mańyzy jóninde oqýshylarmen oı bólisti, dep habarlaıdy «QazAqparat» tilshisi.
Aldymen Nazarbaev zııatkerlik mektebinde bolǵan óńir basshysy: «Búgingideı beıbit zamanda jastarǵa qoıylatyn talap - bilim alý. Eger ár oqýshy mektep qabyrǵasynda, keıin joǵary oqý ornynda sapaly bilim alatyn bolsa, erteńgi kúni elimizdi jańa bıikterge jeteleri anyq. Elbasymyzdyń «Rýhanı jańǵyrý» baǵdarlamasynda jastarǵa erekshe kóńil bólý kerek ekendigi aıtylǵan. Óıtkeni kez-kelgen ulttyń bolashaǵy - jan-jaqty jetilgen, bilim alǵan, azat oıly, sanaly urpaq. Sondyqtan bar ynta-jigerlerińizdi oqýǵa arnańyzdar», - dedi.
Oblys ákimi bilim ordasynyń jyldaǵy dástúrine saı Nazarbaev mektebiniń 7-synyp oqýshylarymen mektep aýlasyna alma aǵashyn otyrǵyzdy.
Keıin A.Kólginov №7 jalpy orta bilim beretin mektep oqýshylarymen júzdesti. Oblystaǵy eń baıyrǵy mektepterdiń biri sanalatyn oqý ordasynyń ujymymen áńgimelesip, ǵımarat ishin aralap, mekteptiń materıaldyq-tehnıkalyq bazasyn kórdi. Oblys ákimi arnaıy bas suqqan taǵy bir bilim oshaǵy - daryndy balalarǵa arnalǵan S.Seıfýllın atyndaǵy №11 mektep-ınternat kesheni. Munda bilim álemine jańa qadam basqan alǵashqy synyp oqýshylarymen áserli áńgime órbip, oblys ákimi olarǵa Elbasynyń kitaptaryn tabys etti. 90 jyldan astam tarıhy bar bilim oshaǵynan osy jyldar ishinde myńdaǵan bilimdi shákirt túlep ushty. Solardyń izin jalǵaǵan búgingi býyn da óz jetistikterimen mektep mereıin asyryp júr. Arnaıy kezdesýge kelgen oblys ákimin Qazaqstannyń qalyptasýy men damýy týraly syr shertetin arnaıy derekti fılmdi kórýge shaqyrǵan joǵary synyp oqýshylary keıin suraqtaryn da qoıdy. Elimizde qolǵa alynǵan «Rýhanı jańǵyrý» baǵdarlamasy týraly da óz saýaldaryn qoıyp, pikirlerin bildirdi. Suraq qoıýshy oqýshylardyń arasynda óz oılaryn aǵylshyn tilinde jetkizgender boldy. Sondaı-aq jastardyń qarjylyq saýattylyǵyn arttyrý maqsatynda mektep baǵdarlamasyna arnaıy pán engizý týraly da usynystaryn aıtty.
Aıta ketý kerek, bıyl Batys Qazaqstan oblysy boıynsha 12 bilim berý nysanyna 1 241,0 mln teńgege kúrdeli jóndeý júrgizilse, 10 bilim berý nysany boı kóterýde. Olardyń tórteýi aýdandarda. Sondaı-aq keler jyly kúrdeli jóndeýdi qajet etetin nysandardyń tizimin jasaý boıynsha jumystar atqarylýda. Osy oraıda №21 jalpy orta bilim beretin mektepke arnaıy barǵan oblys ákimi oqý ordasyn aralap kórip, aldaǵy jyly ony kúrdeli jóndeýdi qajet etetin nysandardyń qataryna qosý týraly tapsyrma berdi.
