BQO ákimi óńirde qaýipsizdik sharalaryn kúsheıtýdi tapsyrdy
ORAL. QazAqparat - Batys Qazaqstan oblysynyń ákimi Altaı Kólginov kórshiles Aqtóbe oblysynyń ortalyǵynda bolǵan lańkestik áreketterge baılanysty óńirde qaýipsizdik sharalaryn kúsheıtýdi tapsyrdy.
BQO ákimdiginde ótken jıynda quqyq qorǵaý organdarynyń ókilderi, aýdan ákimderi jáne basqarma basshylary óńirdegi qaýipsizdik sharalary jaıly málimdedi. Sonyń ishinde oblystyq din isteri basqarmasynyń basshysy men oblystyń bas ımamy Ramazan aıy kezinde túsindirý jumystarynyń kúsheıtilgenin jetkizdi.
Aldaǵy ýaqytqa josparlanǵan kópshiliktiń qatysymen ótetin is-sharalar kezinde oblys turǵyndarynyń densaýlyǵy men qaýipsizdigin qamtamasyz etý tıisti basqarmalarǵa, quqyq qorǵaý organdaryna jáne jergilikti polıtsııa qyzmetiniń basshylyǵyna júkteldi.
Aqtóbe qalasyndaǵy 6655-áskerı bólimine lańkester jasaǵan qylmystyq áreket kezinde erlikpen qaza tapqan Berik Qalıevtiń jerleý rásimine qatysty oblys ákiminiń tapsyrmasyna sáıkes uıymdastyrý jumystary júrgizilip jatqanyn Jánibek aýdanynyń ákimi Naýryzbaı Qaraǵoıshın baıandady.
Oblysta jaǵdaı turaqty, quqyq qorǵaý organdary kúsheıtilgen tártippen jumys jasaýǵa kóshken.
Sonymen qatar BQO ákimi Aqtóbe qalasyndaǵy atys kezinde erlikpen qaza tapqan Berik Qalıevtiń týma-týystaryna kóńil aıtty. Marqumnyń otbasyna oblys ákimdigi tarapynan qajetti járdem jasalýda. Aldaǵy ýaqytta onyń esimin el esinde qaldyrý baǵytynda sharalar qolǵa alynatyn bolady. Marqumnyń sońynda áıeli men tórt balasy qaldy.
