BQO ákimi óńirde benzın 200 teńgege satylǵanyn moıyndady
ASTANA. QazAqparat - Batys Qazaqstan oblysynyń shalǵaı aýdandarynda benzın baǵasy turaqtaldy. Bul týraly búgin Ortalyq kommýnıkatsııalar qyzmetindegi brıfıngte atalǵan óńirdiń ákimi Altaı Kólginov aıtty, dep habarlaıdy QazAqparat.
Brıfıng barysynda BAQ ókilderi Batys Qazaqstan oblystarynyń shalǵaı aýdandarynda benzın baǵasynyń 200 teńgege deıin jetkenin aıtyp, bul máseleniń qalaı sheshilgendigin suraǵan bolatyn.
«Ózderińiz de bilesizder, óńirlerdiń barlyǵynda mundaı problema boldy. Bizge jyl saıyn AI-92 benzıniniń 300 myń tonnasy qajet etiledi. Onyń 70 paıyzyn Reseıden alamyz. Sol sebepti keıbir qıynshylyqtar boldy. Biz Energetıka mınıstrligimen birlesip, bul máseleniń oń sheshimin tabýdamyz»,- dedi ol.
Óńir basshysynyń aıtýynsha, qazirgi ýaqytta Batys Qazaqstan oblysynda AI-92 markaly benzınge qatysty dúrbeleń joq. Lıtri 150-den 157 teńgege deıingi aralyqta satylyp jatyr.
«Siz aıtyp otyrǵan 200 teńge 600 shaqyrym qashyqtyqta ornalasqan Bókeı ordasy aýdanynda boldy. Ol jerge tek qana bir kásipker benzın aparady. Jol joq. Biz bul baǵany túsirdik. Qazirgi ýaqytta benzınge qatysty qıynshylyq ta, tapshylyq ta joq», - dedi Altaı Kólginov.
