BQO ákimi óńir jurtshylyǵyn Jańa jyl merekesimen quttyqtady
ORAL. QazAqparat - Batys Qazaqstan oblysynyń ákimi Altaı Kólginov Aq Jaıyq jurtshylyǵyn Jańa jyl merekesimen quttyqtady, dep habarlaıdy «QazAqparat» HAA tilshisi.
«Qurmetti batysqazaqstandyqtar!
Sizderdi Jańa jyl merekesimen shyn júrekten quttyqtaımyn!
Elimiz úshin de, óńirimiz boıynsha da tabysty ári tarıhı oqıǵalarǵa toly bolǵan 2016 jyldy shyǵaryp salýdamyz. El táýelsizdiginiń 25-inshi jyly Elbasy Nursultan Ábishuly Nazarbaev usynǵan «100 naqty qadam» Ult jospary júzege asa bastady. Reformalardyń alǵashqy jyldaǵy bastapqy nátıjelerin bizdiń óńirimizdiń turǵyndary da naqty sezindi. El Prezıdentiniń qoldaýy men memlekettik baǵdarlamalardyń nátıjesinde tek ótken on eki aıda oblysymyzda 250 shaqyrym jol jóndelip, 215 áleýmettik nysan jańartyldy. Oblys ortalyǵynda jańa alań ashylyp, 300 oryndyq kópbeıindi aýrýhana, oqýshylar jáne jastar saraıy paıdalanýǵa berildi. Sondaı-aq 1500 otbasy baspanaly bolǵan qutty jyl boldy. Elimizdiń Batys qaqpasy atanǵan bizdiń óńirimiz Táýelsizdigimizdiń 25 jyldyq mereıtoıyna osyndaı tolaıym tabystarmen jetti. Elbasynyń sózimen aıtar bolsaq, «Ult jospary ulaǵatty jolǵa bastap keledi».
Biz qoǵam bolyp jyl boıy uıymdastyrǵan mańyzdy sharalarymyzdyń bárin Qazaqstan Respýblıkasy Táýelsizdiginiń 25 jyldyq mereıtoıymen baılanystyrdyq. Toılaýdy emes, oılaýdy murat etip, azattyqtyń alǵashqy shırek ǵasyrynda qol jetkizgen tabystarymyzdy saralap, salmaqtadyq. Oı qorytyp, bolashaqqa degen senimimizdi nyǵaıttyq.
Qadirli aǵaıyn!
Árqaısylaryńyzdyń otbasylaryńyzǵa mol tabys, berik yntymaq tileımin!
Jańa jyl qutty da berekeli bolsyn!», delingen onda.
