BQO ákimi Nazarbaev zııatkerlik mektebiniń shákirtterimen kezdesti
ORAL. QazAqparat - Batys Qazaqstan oblysynyń ákimi Altaı Kólginov Oral qalasyndaǵy Nazarbaev zııatkerlik mektebinde bolyp, atalmysh bilim ordasynyń damý baǵyty, shákirtteriniń tabysy men ozyq tájirıbeni taratý máseleleri qozǵalǵan qamqorshylyq keńesiniń otyrysyna qatysty, dep habarlaıdy QazAqparat.
Nazarbaev zııatkerlik mektebiniń baspasóz qyzmetinen túsken málimetke qaraǵanda, keńes otyrysynan keıin óńir basshysy Qazaqstan Respýblıkasy Táýelsizdiginiń 25 jyldyǵyna arnalǵan «Keıipkerge 25 suraq» jobasy aıasynda joǵary synyp oqýshylarymen kezdesti.
Bul jobanyń maqsaty - zııatkerlerdi elge jáne óńirge tanymal, isimen úlgi-ónege bolatyn jandarmen kezdestirý arqyly olardyń tulǵalyq-kóshbasshylyq qasıetterin damytý.
Erkin formattaǵy kezdesýde zııatkerler Altaı Seıdirulyna ózderin tolǵandyrǵan saýaldaryn qoıdy. Kezdesý barysynda kóshbasshylyq qasıetterdi damytý, súıikti kitap jáne tulǵa, shetelde bilim alǵan jastardyń elimizge qaıta oralýy jáne memleket aldyndaǵy jaýapkershilik, syn jáne onyń tulǵany damytýǵa áseri týraly áńgime órbidi.
Shara sońynda 11-synyp oqýshysy Dıana Jumabaeva oblys ákimine óziniń «Arman qala - Astana» dep atalatyn tól týyndysyn syıǵa tartty.
