BQO ákimi men Orynbor gýbernatory Jaıyqty saqtap qalý baǵdarlamasyn talqylady

Orynbor oblysynyń gýbernatory Denıs Paslermen kelissóz barysynda negizgi taqyryp Jaıyq transshekaralyq ózenin saqtap qalý baǵdarlamasy boldy.

Onda Ǵalı Esqalıev Jaıyq ózeniniń máselesin sheshýdiń baǵdarlamasyn birlesip naqtylaý qajettiligin aıtty.

Gýbernator Denıs Pasler búginde Tabıǵı resýrstar mınıstrligi Reseı Federatsııasynyń Prezıdentine baǵdarlamanyń daıyndyǵy jáne qarjylandyrý kózin anyqtaý týraly esep daıyndap jatqanyn atap ótti.

- Búginde óńirler arasynda ǵylymı yntymaqtastyq qarqyndy damyp keledi. Máselen, buryn batysqazaqstandyq ǵalymdar men Orynbor sıyr eti ınstıtýtynyń qyzmetkerleri BQO-daǵy qazaqtyń aqbas tuqymdy iri qara tuqymyn ósirýmen birge aınalysqan. Osy yntymaqtastyqty qaıta jandandyrý qajet dep sanaımyn. Sonymen qatar Batys Qazaqstan oblysy Reseı ǵylym akademııasy Ýral bólimshesiniń dala ınstıtýtymen, Reseı Federatsııasy bıologııalyq júıeler men agrotehnologııalar federaldy ǵylymı ortalyǵymen jumys isteýge de múddeli, - dedi BQO ákimi.

BQO et, transformator, polıetılen qubyrlaryn eksporttaıdy. Orynbor oblysynda azyq-túlik óndirisi jaqsy damyǵan. Ony Batys Qazaqstanǵa eksporttaýdyń bolashaǵy bar. Ǵ.Esqalıev eki aımaq arasynda iskerlik yntymaqtastyq klýbyn qurýdy usyndy.

Oblys ákimdigi Orynbor kásipkerleriniń BQO-nyń ınvestıtsııalyq jobalaryna qatysa alatynyn aıta ketip, óńirde ınvestorlarǵa barlyq jaǵdaı jasalǵanyn atap ótti.

Kelissóz barysynda Bórli aýdanynyń turǵyndaryn mazalaıtyn másele de kóterildi. Bul Orynbor oblysynyń Tashla aýdanyndaǵy gaz ken ornyndaǵy gaz qaldyqtarynyń shamadan tys aýaǵa shyǵýy týraly boldy.

Ǵalı Esqalıev osy másele boıynsha baqylaýdy kúsheıtip, batysqazaqstandyq mamandarǵa gaz qaldyqtarynyń aýaǵa shyǵý mólsherin ólsheıtin qurylǵylarmen jumys isteýge ruqsat berýdi usyndy. Orynbor oblysynyń gýbernatory oblys ákiminiń usynysyn qoldady.

Saratov oblysynyń basshysy Valerıı Radaevpen onlaın kezdesýdegi kelissóz taqyryby «Fomın» ótkizý pýnkti arqyly avtomobılderdi ótkizý jumystaryna daıyndyq týraly boldy. Onyń aıtýynsha, «Fomın» beketine deıingi joldy jóndeý 2021 jyly bastalady.

BQO ákiminiń sózine qaraǵanda, iri qara mal etin atalǵan pýnkt arqyly ótkizý eki jaqqa da tıimdi jáne osy baǵyttyń úlken áleýeti bar ekenin aıtty. Sondaı-aq BQO tarapy bekettiń jumysy jandaný úshin qajetti ınfraqurylym salýǵa daıyn ekendigi aıtyldy.

Gýbernatorlarmen bolǵan eki onlaın kezdesý barysynda oblys ákimi Ǵ.Esqalıev epıdemıologııalyq ahýal jaqsarǵan jaǵdaıda, kelesi jyly ekologııalyq, sporttyq jáne mádenı is-sharalardy, eki jaqty saýda jármeńkelerin úzbeı ótkizip turýdy usyndy.