BQO ákimi qos aýdanda boldy
Shyńǵyrlaý aýdanynda ótken jyly «Nurly jol» baǵdarlamasyna sáıkes paıdalanýǵa berilgen 290 oryndyq «Bolashaq» babalaqshasynyń jumysymen, aýdandyq taýar óndirýshiler kórmesimen tanysqan óńir basshysy sodan keıin aýdan ákimi Albert Esálıevtiń turǵyndarmen eseptik kezdesýine qatysty. Onda Altaı Kólginovtiń atap ótkenindeı, Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyna sáıkes kásipkerlerge, aýyl sharýashylyǵyn damytýǵa, jalpy aýyl halqyna qoldaý kórsetiletin bolady. Mysaly, bıyl Tasmola jáne Lýben aýyldaryndaǵy sý qubyrlaryn jańǵyrtýǵa 352 mln. teńge bólinip otyr. Bul jumystar aldaǵy jyly jalǵasady. Tasmoladaǵy feldsherlik-akýsherlik pýnktti (FAP) kúrdeli jóndeýge jergilikti qazynadan 32 mln. teńge qaraldy. Almazda aýyldyq mádenıet úıin kúrdeli jóndeý márege jetip, FAP-ty retke keltirý jumystary bastalady. Bul maqsatqa 100 mln. teńge berildi. Sondaı-aq aýdan ortalyǵy Shyńǵyrlaýda aýylishilik joldar qurylysyna oblystyq bıýdjetten 252 mln. teńge qarastyryldy.
Oblys basshysy Aqsaı qalasynda ótken jyl sońynda iske qosylǵan, 5-inshi jáne 7-shaǵynaýdandy jylýmen qamtıtyn qos qazandyq, «Aqsaı» sport keshenimen jáne aldaǵy Naýryz merekesine oraı paıdalanýǵa berý kózdelip otyrǵan 320 oryndyq balabaqsha qurylysymen tanysty.
Aýdan ákimi Aldııar Halelovtiń eseptik kezdesýine qatysqan Altaı Kólginov jyl qorytyndylaryna toqtalyp, alda turǵan mindetterdi atap kórsetti. Bórli aýdanynda da bıyl birqatar jumystar josparlanýda. Aıtalyq, respýblıkalyq bıýdjet esebinen Aqsaı-Jympıty baǵytynda 15 km jol qurylysyn júrgizý kózdelýde. Oǵan qosa Aqbulaq aýylynan oblystyq jolǵa shyǵatyn 15 km jol qurylysy salynbaq, buǵan jergilikti qazynadan 300 mln. teńge qaraldy. 2016 jyly Aqsaıdyń 16 kóshesine qatysty jobalaý-smetalyq qujattamasy jasalsa, bıyl ortalyq kósheler joldaryna ortasha jóndeý júrgizilmek. Bórli aýylynyń ortalyq Dostyq kóshesinde jol salynbaq. Eldi mekenderdi sýmen qamtý baǵytynda da tıisti jumystar atqarylady.
Aıta keteıik, Berezov pen Bestaý aýyldarynyń turǵyndaryn tolyqtaı kóshirý bıylǵy tamyzda bastalmaq. Aýdan ákimdiginen túsken málimetke qaraǵanda, osyǵan baılanysty qazirgi kezde Aqsaı qalasy men Araltal aýylynda qurylys qyzý júrgizilýde. Barlyǵy 1259 adam (375 úı) qonys aýdarmaq. «QPO b.v.» kompanııasy Aqsaıdaǵy «Qarashyǵanaq-1» shaǵynaýdanynda árqaısysy 153 páterlik eki turǵyn úı, Araltalda jer telimi bar 100 úı salýda. Kóshý kezinde kólik jaǵynan da kómek kórsetiletin bolady. Qonys aýdarýshylardyń balalaryn eskere otyryp, Aqsaıdyń 10-shaǵynaýdanynda 320 oryndyq balabaqsha, Araltalda 300 oryndyq mektep boı kóterýde.
Budan buryn Berezov pen Bestaý aýyldarynyń turǵyndaryn kóshirýdiń birinshi kezeńinde 82 úı turǵyndary (416 adam) Aqsaıdaǵy 80 páterlik jáne 75 páterlik úılerge ornalasqan bolatyn.
