BQO ákimi koronavırýspen kúresip jatqan dárigerlermen baılanysqa shyqty
ORAL. QazAqparat – Batys Qazaqstan oblysynyń ákimi Ǵalı Esqalıev koronavırýspen kúresip jatqan medıtsına qyzmetkerlerimen beınebaılanys arqyly sóılesti, dep habarlaıdy QazAqparat tilshisi.
Olardyń arasynda osy indetten emdelip jatqandar, sondaı-aq aldyńǵy shepte eńbek etip júrgen medıtsına qyzmetkerleri bar.
Óńir basshysy medıtsına qyzmetkerlerine qoldaý bildirip, olardyń kóńil-kúıin, hal-jaǵdaıyn surap bildi.
«Naýqastarmen jaqyn qarym-qatynas olardy emdeýshi dárigerlerge juqtyrý qaýpin týǵyzady. Sizder óz borysh-mindetterińizdi adal atqaryp jatyrsyzdar, sol úshin alǵys aıtamyz», - dedi ákim.
Oblysta 36 medıtsına qyzmetkeri koronavırýs juqtyrsa, sonyń tórteýi jazylyp shyqty. Al oblystyq juqpaly aýrýlar aýrýhanasynda emdelip jatqandary ózderiniń psıhologııalyq kóńil-kúıi, qandaı em alyp jatqandary jóninde áńgimelep berdi.
Ákim olardyń tezirek saýyǵyp, qatarǵa qosylýyna tilektestigin bildirdi. Karantın bitip, úılerine oralǵannan keıin medıtsına qyzmetkerleriniń eńbegi eskerýsiz qalmaıtynyn jetkizdi.
Oblys basshysy sondaı-aq oblystyq juqpaly aýrýlar aýrýhanasynyń dárigerlerimen de sóılesti. Qazirgi kezde olar otbasyna qaýip tóndirmes úshin úı kórmeı, jumys jasaýda.
«Koronavırýs indetimen búkil álem kúresip jatyr. Onyń birqatar elderdiń ekonomıkasyna tıgizip jatqan orasan zor zııany soǵys salǵan lańnan kem emes. Bizdiń bárimiz qalypty ómirge oralý úshin sizderdiń atqaryp jatqan qyzmetterińiz asa mańyzdy», - dedi Ǵalı Esqalıev.
Dárigerler jumysqa qajetti barlyq jaǵdaıdyń jasalyp jatqanyn, árbir emdelýshiniń jaı-kúıi qaltqysyz baqylaýda ekendigin aıtty.
Ǵ.Esqalıev dárigerlerden qandaı ma bolsyn ózekti másele, usynys-tilekterin oblystyq densaýlyq saqtaý basqarmasynyń basshylyǵyna jasyrmaı jetkizip otyrý kerektigin atap ótti.
«Bul máselede qysylyp-qymtyrylýdyń qajeti joq. Oblys tynyshtyǵy sizderdiń jumys sapańyzǵa baılanysty», dedi ákim.
Aıta keteıik, 5 sáýir kúngi saǵat 22.50-degi málimet boıynsha BQO-da taǵy bir adamnyń koronavırýs juqtyrǵany belgili boldy. 32 jastaǵy medıtsına qyzmetkeri buryn koronavırýspen aýyrǵan adammen qarym-qatynasta bolǵan. Sóıtip ol da oblystyq juqpaly aýrýlar aýrýhanasyna ornalastyryldy.
Osylaısha BQO-da aýyrǵandar sany 199-ǵa jetip, sonyń 41-i emdelip shyqty.
