BQO ákimi qolynan is keletin kásipkerlerge qoldaý bildirýge ázir ekendigin aıtty

Bul týraly oblys ákimi Altaı Kólginovtiń óńirde kásipkerlikti damytý máseleleri boıynsha isker azamattarmen  kezdesýinde aıtyldy, dep habarlaıdy «QazAqparat» HAA tilshisi.

Jıynnyń maqsaty kásipkerlikti qoldaý baǵytyndaǵy memlekettik saıasatty aýyldan kelgen, qaladaǵy qarapaıym azamattarǵa túsinikti tilde jetkize bilý boldy. 2016 jyly memlekettik baǵdarlamalar negizinde júzege asyrylǵan jumystar qorytyndylanyp, Elbasy Joldaýynda erekshe mán berilgen kásipkerlik salasyn óńirde odan ári damytý sóz boldy.

 

Bıznesti endi bastaǵan, isti qolǵa alýdy oılap júrgen azamattar óńirlik kásipkerler palatasynan, «Damý», «Aýyl sharýashylyǵyn qarjylaı qoldaý qory» AQ oblystyq fılıaly jetekshilerine suraqtaryn qoıyp, tıisti aqparattarǵa qol jetkizdi.

Aqjaıyq aýdanynan kelgen Janar Berdalıeva 50 oryndyq jeke balabaqsha salǵysy keledi. Alaıda memlekettik saraptamanyń 100 oryndyq degen talaby kedergi bolǵanyn jetkizdi. Oblys ákiminiń aralasýymen bul kedergi joıyldy. Sondaı-aq Oral qalasyndaǵy óziniń garajyn tigin tsehyna aınaldyrǵan Zýhra Qurbanbaeva qazir mektep formasyn tigedi. 100 adamǵa deıin jumyspen qamtyǵysy keletinin aıtqan ol qosymsha qoldaý surady. Oblys ákimi Altaı Kólginov: «Qolynan is keletin sizderdeı azamattardy árqashan qoldaýǵa ázirmiz», - dedi.

 

Aıta keteıik, bıyl óńirde shaǵyn jáne orta kásipkerlikti óńirlik qarjylandyrý baǵdarlamasy aıasynda 1,4 mlrd. teńge bólindi.

«Damý» kásipkerlikti damytý qory» AQ óńirlik fılıalynyń dırektory Erbol Idenovtiń sózine qaraǵanda, ótken jyly oblys ákimdigimen birge bul maqsatqa 500 mln. teńge qaraldy. Qazirgi tańda 901 mln. teńgege 25 joba qarjylandyryldy. Taǵy tórt joba ekinshi deńgeıdegi bankterde qaralýda. Bulardyń ishinde 18-i nemese 62 paıyzy aýyldyq jerlerde júzege asyrylýda. Ásirese, Qaztalov, Zelenov aýdandary (4 jobadan), Oral qalasy (11 joba) kásipkerleri belsene qatysýda. Baǵdarlama aıasynda 39 jańa jumys orny ashyldy.