BQO ákimi kóktemgi sý tasqynynyń aldyn alýdy tapsyrdy
ORAL. QazAqparat - Qysqy, sondaı-aq aldaǵy kóktemgi mezgilde bolýy yqtımal tótenshe jaǵdaılardyń aldyn alý qajet. Bul týraly búgin oblys ákimi Altaı Kólginovtiń tóraǵalyq etýimen ótken tótenshe jaǵdaılardyń aldyn alý jáne zardaptaryn joıý jónindegi komıssııa otyrysynda aıtyldy, dep habarlaıdy «QazAqparat» HAA tilshisi.
Jıynda BQO TJ departamentiniń bastyǵy Jasulan Jumashevtiń málim etkenindeı, ótken jyly óńirde 66 tótenshe oqıǵa tirkelip, 39 adam qaza taýyp, 87-si zardap shekti. Materıaldyq shyǵyn kólemi 23,128 mln. teńgeni qurady. Tótenshe jaǵdaılardyń basym kópshiligi Oral qalasy, Zelenov, Bórli, Terekti aýdandarynyń úlesine tıedi. Oblysta sondaı-aq 635 órt tirkelip, sonyń saldarynan 9 adam qaza taýyp, 23-i jaraqat aldy.
Bıyl jyl basynan beri 5 TJ tirkelip, 3 adam zardap shekse, sonyń bireýi kóz jumdy.
Óńirdegi kóktemgi sý tasqynynyń erekshelikterin eskere otyryp, oǵan jan-jaqty daıyndalmasa bolmaıdy. Bul baǵyttaǵy jumystar bastalyp ta ketti.
«Oblysta bıyl qar mol túskeni málim. Boran kezinde TJ departamentiniń kúshimen 25 tehnıka, 127 adam (onyń beseýi - balalar) qar qursaýynan shyǵaryldy. Osy oraıda «Qazaqavtojol» RMK Batys Qazaqstan fılıalynyń atyna aryz-shaǵym kóp aıtylýda. Respýblıkalyq mańyzy bar joldar ýaqtyly arshylmaıdy, atalǵan mekeme shaqyrtýǵa kelmeıdi, joldan taıyp ketken avtokólikterdi shyǵarýǵa járdemdespeıdi», dedi J.Jumashev.
«Qazgıdromet» RMK BQO fılıalynyń málimetine qaraǵanda, bıyl óńirde ótken qystaǵydan qar 70 paıyzǵa kóp túsken. Jaıyq ózenindegi muzdyń qalyńdyǵy 40 santımetrge jetken. Bul oblysta sý tasqyny qaýpiniń kúshti ekendigin kórsetedi.
Jıyndy qorytyndylaǵan oblys ákimi Altaı Kólginov tıisti mekemeler basshylaryna, sondaı-aq Oral qalasy, Zelenov, Tasqala, Qaztalov jáne basqa aýdandar ákimderine kóktemgi sý tasqynyna baılanysty jaǵdaıdy kúnbe-kún baqylap, monıtorıng jasap, barlyq qajetti sharalardy alýdy tapsyrdy.
